Tagikistan

ДАРАИ РОМИТ

AKN - 10 ore 45 min fa

Дар Ҷумҳурии Тоҷикистон минтақаҳои сайёҳӣ зиёданд, ки аксари онҳо аз даврони истиқлолият ҳамчун минтақаҳои сайёҳӣ шинохта шудаанд. Яке аз ин минтақаҳои сайёҳӣ дар шаҳри Ваҳдат ҷойгир шудааст. Шаҳри Ваҳдат яке аз шаҳрҳои пешрафта ва минтақаи сайёҳии кишвар ба шумор рафта, бо табиат ва иқлими мусоиди худ дорои ҷойҳои истироҳатию фароғатӣ ва табобатӣ аз қабили дараи Ромит, Мамнӯъгоҳи Ромит, гармчашмаи шифобахши “Зайрон”, оби шифобахши “Шӯр”, пойгоҳи сайёҳӣ ва ғайра мебошад, ки дар ҳудуди онҳо мавзеъҳои табобатию сайёҳӣ бисёранд ва тӯли солҳои зиёд дар хизмати сокинони кишвар ва сайёҳони берун аз кишвар қарор доранд.

Дараи сайёҳиву истироҳатии Ромит дар миёни дигар минтақаҳои Тоҷикистон ҷойи намоёнро ишғол намуда, соли 1959 бо қарори Ҳукумати Шӯравӣ ташкил карда шудааст ва он аз 18 сентябри соли 2000-ум бо қарори Ҳукумати Ҷумҳурии Тоҷикистон “Дараи Ромит минтақаи сайёҳию истироҳатии Тоҷикистон” эълон гардидааст. Мувофиқи маълумотҳо дараи Ромит дар паҳнои 16 200 гектар замин доман густурда, дар “Мамнӯъгоҳи давлатии табии Ромит” муттаҳид карда шудааст ва то 50 километр тӯл мекашад. Ин дара дар самти Шарқ ба Обигарм ва аз тариқи дараи Канаск ба дараи Камароби ноҳияи Рашт, дар Ғарб аз тариқи Роҳатӣ ва теппаи Самарқандӣ ба дараи Варзоб ва аз он тараф то марзи Регар бо Ӯзбекистон, инчунин дар самти Шимол ба навоҳии Айниву Мастчоҳи вилояти Суғди Тоҷикистон роҳ дорад.

Дараи хушманзараи Ромит дар болооби дарёи Кофарниҳон ҷойгир буда, номашро аз номи деҳаи зебои Ромит гирифтааст. Дар дараи мазкур меҳмонхонаву тарабхонаҳои замонавӣ ва чойхонаҳои миллӣ сохта шудаанд, ки дар давоми сол метавонанд садҳо сайёҳони дохилӣ ва хориҷиро қабул намоянд. Гармчашмаи шифоии “Зайрон” низ дар ҳамин дара ҷойгир аст, ки мисли дигар гармчашмаҳои ҷумҳурӣ маълуму машҳур аст. Ин оби шифобахш барои табобати дарди миёну пой, буғумҳо хеле муфид аст.

Дар ин минтақа гармхонаҳои тобистона, фабрикаи парандапарварӣ, заводи консервабарорӣ, идораи занбӯри асалпарварӣ, хоҷагиҳои ҷангали Кофарниҳон, Ромит, якчанд истироҳатгоҳҳои корхонаву идораҳои давлатӣ ва ғайра ҷойгиранд.

Ҳамасола дар дараи Ромит лагерҳои истироҳатии тобистона ба монанди “Ҳамсафар”, “Афсонаи кӯҳӣ”, “Кайҳон”, “Булбулакон”, “Явроз” ва ғайра фаъолият менамоянд, ки аз тамоми гӯшаҳои мамлакат наврасон аз оилаҳои камбизоат, кӯдакони болаёқат, ҷавонон аз корхонаҳо ва кумитаҳои гуногун барои истироҳат фаро гирифта мешаванд.

Ҳангоме ки аз ин мавзеъ дидан менамоем, зебогии кӯҳу даман ва табиати зебо ва нотакрори онро эҳсос мекунем. Обҳои зулоли ин минтақа ба кас рӯҳу илҳоми тоза бахшида, манзараҳои он диққати шахсро ба худ ҷалб мекунанд.

Categorie: Tagikistan

ГАРМЧАШМА

AKN - 10 ore 52 min fa

Гармчашма – чашмаи гарми минералӣ дар Тоҷикистон буда, он дар қисмати миёнаи шохоби дарёи Панҷ дар нишебии ғарбии қаторкӯҳи Шаҳдараи Помир, дар ноҳияи Ишкошими Вилояти Мухтори Кӯҳистони Бадахшон ҷойгир мебошад.

Дар 42-километрии ҷанубу шарқи шаҳри Хоруғ, 60-километрии деҳаи Ишкошим, осоишгоҳи Гармчашма фаъолият мекунад, ки дар онҷо чашмаҳои минералии табии зиёд мавҷуд мебошад. Ин чашмаҳоро бори аввал соли 1928 минералоги рус А.Н.Лабунсов ва ёрдамчии ӯ Н.И.Березкин таҳқиқ кардаанд.

Обҳои маъданӣ аз қаъри чуқури ҷинсҳои кристаллӣ ва метаморфикии қадим дар шакли грифинҳои фаввора ба рӯи замин меоянд. Баромадгоҳҳои ин обҳо дар қуллаи теппаҳо ҷойгиранд, ки дар зарфи мавҷудияташон шушаҳоро (травертин) бо баландии 7-8 метр ва дарозии то 1500 метр ба вуҷуд овардаанд.

Кӯҳ – теппаи Гармчашма ба сӯи дарё нишеб аст. Дар ин маҳал панҷ зина қабатҳои шушаҳо (травертин) мавҷуданд, ки синну солашон гуногун аст. Дар оби чашмаҳои Гарм-Чашма сулфиди карбон, хлорид-гидрокарбонат, кремнийи натрий мавҷуд мебошад. Сулфиди гидроген дар об 170 мг/л буда, ҳарорати миёнаи об 59°C мебошад. Минерализатсияи умумиаш бошад ба 3,0 – 3,3 г/л мерасад.

Аз сабаби минерализатсияи баланди об ва ҳарорати он, дар ҷойҳои фаворазании обҳо ҷамъшавии қатрагии карбонати калтсий, сталактитҳои зебои калон ба мисли яхпораҳои шишагин ба вуҷуд омадаанд. Соли 2009 дар ҳудуди чашмаи шифобахши “Гармчашма” маҷмааи нави солимӣ ва сайёҳӣ бунёд карда шуда, дар заминаи он меҳмонхонаи 3-ситора, истироҳатгоҳ ва ҳуҷраҳои оилавӣ сохта ба истифода дода шуд. Бояд гуфт, ки маҷмааи тандурустӣ ва сайёҳӣ метавонад дар як шабонарӯз тақрибан 240 меҳмонро қабул намояд. Иншооти мазкур моҳи июни соли 2010 ба истифода дода шуд.

Categorie: Tagikistan