Tagikistan

«ИН ОТАШИ САДАРО РАВШАН КУНЕД, ЭЙ ДӮСТОН!». Адибони тоҷик роҷеъ ба Сада, ин ҷашни бостонии ниёгон бо муҳаббат менависанд

Ховар - 2 ore 8 min fa

ДУШАНБЕ, 24.01.2020. /АМИТ «Ховар»/. Дар ин чанд соли охир баробари эҳё шудани ҷашни Сада шоирону нависандагону олимон, журналистону навқаламон- ҳар касе, ки ошиқи фарҳанги ниёгон аст, ҷашнҳои Наврӯз, Тиргон, Меҳргон, Сада ва Ялдоро ситоиш менамоянд. Олимон дар бораи Сада мақолаҳои илмӣ таълиф менамоянд. Адибон бо муҳаббат роҷеъ ба Сада менависанд.

Олимону нависандагон дар нигоштаҳои хеш маъно ва мафҳуми ин ҷашни табиии хуршедиро, ки аз шаби чилла (Ялдо) оғоз шуда, ба самти Сада, Наврӯз, Тиргон, Меҳргон меравад ва ҳамин тавр ҳар сол бо рангу бӯи дигар такрор мешавад, шарҳ медиҳанд. Ҳамаи ин ҷашнҳоро, ки бо Хуршеди оламтоб ва равшании он вобаста аст, мегӯянд, менависанд, меситоянд ва месароянд.

Аз ҷумла, яке аз ошиқони ҷашни Сада бо номи Равшангар барои хонандагони АМИТ «Ховар» шеъре пешниҳод намудааст, ки манзур менамоем:

САДА ОМАД, САДА ОМАД

Сада омад, Сада омад,

Ба ҳар хона нур даромад.

Чилрӯза шуд Офтоби мо,

Гулхан занед, ки баромад.

Нақарот:

Гулхан кунед, эй дӯстон,

Гулшан кунед, эй дӯстон.

Ин оташи Садаро,

Равшан кунед, эй дӯстон.

Сада омад, Сада омад,

Ба табиат ҷон даромад.

Аз баракати ин Офтоб,

Сабзаҷон сар  баровард.

Нақарот:

Гулхан кунед, эй дӯстон,

Гулшан кунед, эй дӯстон.

Ин оташи Садаро,

Равшан кунед, эй дӯстон.

Сада омад, Сада омад,

Барои ҳар банда омад.

Нури Хуршедро бубинед,

Ба ҳар хона ханда омад.

Нақарот:

Гулхан кунед, эй дӯстон,

Гулшан кунед, эй дӯстон.

Ин оташи Садаро,

Равшан кунед, эй дӯстон.

Деҳқонбобо шод бишуд,

Барфо кам-кам об бишуд.

Бо дидани Офтобак,

Аҳриман ҳам хоб бишуд.

 Нақарот:

Гулхан кунед, эй дӯстон,

Гулшан кунед, эй дӯстон.

Ин оташи Садаро,

Равшан кунед, эй дӯстон.

Categorie: Tagikistan

Профессор Насрулло Убайдулло: «Туҳфаи «Тоҷикон» ба ҳар хонадони кишвар — иқдоми беназири Пешвои миллат ва таҳрикдиҳандаи эҳсоси ватандӯстӣ ва ифтихори миллӣ”

Ховар - 2 ore 14 min fa

ДУШАНБЕ, 24.01.2020 /АМИТ «Ховар»/. Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон 26 декабри соли 2019 зимни пешниҳоди  Паёми навбатӣ ба Маҷлиси Олии  Ҷумҳурии Тоҷикистон дар марҳалаи кунунии инкишофи ҷумҳурӣ афзалиятро бештар ба соҳаҳои илму маориф дода, дар бораи омӯзиши амиқи таърихи пурифтихори халқи тоҷик ва арҷ гузоштан ба аҷдодони худ дастуру супоришҳо доданд. Дар робита ба ин мавзӯъ хабарнигори АМИТ «Ховар» Мавҷуда АНВАРӢ бо доктори илмҳои таърих, профессор, директори Институти таърих, бостоншиносӣ ва мардумшиносии ба номи Аҳмади Дониши  Академияи илмҳои Ҷумҳурии Тоҷикистон Насрулло УБАЙДУЛЛО суҳбат намуд.

АМИТ «Ховар»: Пешвои миллат дар Паёми навбатии хеш ба нақши китобхонаҳо ҳамчун маркази муҳими илму фарҳанг ва омили асосии ҳифзи фарҳанги миллӣ, муҳимтарин воситаи баланд бардоштани сатҳи маърифатнокии сокинон ва пешрафти тафаккуру ҷаҳонбинии онҳо бештар таваҷҷуҳ намуданд. Миллати соҳибфарҳанги мо дар тӯли ҳазорсолаҳо дар минтақаҳои гуногуни Мовароуннаҳру Хуросон китобхонаҳои азим бунёд менамуд. Аз он махзани бузург на танҳо аҳли адабу мансаб, балки фақирону дигар қишрҳои ҷомеа низ метавонистанд истифода баранд. Дастури Пешвои миллат ба ҷомеаи кунунӣ доир ба хондани  китоби бадеӣ ва ҳифзи асарҳои манзуму мансури адибони гузаштаву муосир ба чӣ хотир аст?

Прфессор Насрулло Убайдулло

Насрулло Убайдулло:  Сарвари давлдат  дар Паёми навбатии хеш ба Маҷлиси Олии мамлакат дар баробари рушди илму маориф ва сифати таълиму тарбия ба нақши китобхонаҳо ҳамчун маркази муҳими илму фарҳанг ва омили асосии ҳифзи фарҳанги миллӣ, муҳимтарин воситаи баланд бардоштани сатҳи маърифатнокии сокинон ва пешрафти тафаккуру ҷаҳонбинии онҳо бештар таваҷҷуҳ намуданд, ки ин бесабаб нест. Зеро дар шароити рушди босуръати технологияи итилоотии имрӯза, ки аз кӯчактарин то бузургтарин аҳли ҷомеа аз истифодаи фаъоли он бархӯрдор аст, таваҷҷуҳ ба китоб ва китобхонӣ, махсусан дар байни насли наврас ва ҷавонон ба маротиб коҳиш ёфтааст.        Ташкили чорабиниҳои сатҳи гуногун, озмунҳо, ба мисли Озмуни «Фурӯғи субҳи доноӣ…», зиёд намудани теъдоди китобхонаҳо, нуқтаҳои паҳнкунанда ва фурӯши китоб, аз ҷумла китобҳои электронӣ ва дигар маъракаю ҳамоишҳо тадбири муҳиме дар роҳи ҳарчи бештар ҷалб намудани аҳли ҷомеа ба хониши мустақилонаи китоб мебошанд.

Тоҷикон таърихан ва табиатан мардуми соҳибфарҳанг, тамаддунофар, китобдору китобхонанд ва кам нестанд шумораи китобҳое, ки имрӯз хондани он ба ҳар як фарди ҷумҳурии соҳибистиқлол зарур ва ҳатмӣ аст. Дастури Пешвои миллат ба ҷомеаи кунунӣ доир ба хондани  китоби бадеӣ ва ҳифзи асарҳои манзуму мансури адибони гузаштаву муосир ба хотири баланд бардоштани сатҳи маънавиёти аҳолӣ ҳидояти саривақтӣ ва хирадмандона аст.

АМИТ «Ховар»:  Пешвои миллат  инчунин дар  Паёми хеш ба Ҳукумати мамлакат супориш доданд, ки бо мақсади омӯзиши амиқи таърихи пурифтихори халқи тоҷик шоҳасари Бобоҷон Ғафуров- «Тоҷикон»-ро аз ҳисоби Фонди Президенти Ҷумҳурии Тоҷикистон чоп карда, то ҷашни 30-солагии Истиқлолияти давлатӣ аз номи Сарвари давлат ба ҳар як оилаи мамлакат туҳфа намоянд. Ба андешаи шумо, омӯзиши ин асари бунёдӣ ва чопу дастраси ҳар хонаводаи мамлакат намудани ин китоби арзишманд чӣ аҳамият дорад?

Насрулло Убайдулло: Бешак, яке аз китобҳое, ки хондани он ба сокинони мамлакат ва ҳар нафар тоҷики худшинос заруру воҷиб аст, ин «Тоҷикон»-и академик Бобоҷон Ғафуров мебошад. «Арзиши илмии ин асари бунёдӣ,- таъкид менамоянд Пешвои миллат дар Паём ба Маҷлиси Олӣ,- бениҳоят бузург аст ва Бобоҷон Ғафуров бо заҳмати чандинсолаи худ мо ва мардуми ҷаҳонро бо саҳифаҳои таърихи рангини миллатамон шинос кард».

Аз ин рӯ,  иқдоми Пешвои миллат дар самти тавассути фонди Президенти Ҷумҳурии Тоҷикистон чоп ва дастраси ҳар хонаводаи мамлакат намудани ин китоби арзишманд бисёр беназир буда,   таҳрикдиҳандаи эҳсоси ватандӯстӣ ва ифтихори миллӣ дар ниҳоди ҳар сокини кишварамон хоҳад гардид.

Воқеан, таърихи пурифтихори халқи тоҷик бузургтарин мактаби худшиносӣ барои сокинони мамлакат, ба вижа наврасону ҷавонони он мебошад. Роҳи асосии шиносоии ҷавонону калонсолони мамлакат бо ин мактаб-  омӯзиши адабиёти илмию бадеии таърихӣ аст. Танҳо бо хондану омӯзиши чунин асарҳо насли имрӯза ва ояндаи ҷумҳурӣ дар рӯҳияи меҳанпарастию миллатдӯстӣ ва худшиносию дарки ҳувияти миллӣ тарбия ёфта, аз саҳифаҳои дурахшон, қаҳрамонию диловарии гузаштагон, нақши пешгузаштагони худ дар таърих ва тамаддуни ҷаҳонӣ огаҳӣ пайдо менамоянд.

АМИТ «Ховар»:  Олимон бар ин назаранд, ки ин китоби пурарзиш дар баробари «Шоҳнома»-и Абулқосим Фирдавсӣ, «Таърихи Бухоро»-и Абӯбакри Наршахӣ, «Сиёсатнома»-и Низомулмулк чун шиносномаи халқи тоҷик барои асрҳои оянда низ хизмат менамояд. Шоҳасари академик Бобоҷон Ғафуров ҳамчун асари бунёдии таҳқиқотӣ дар илми таърих ва ховаршиносии ҷаҳон чӣ гуна мақомро ишғол менамояд?

Насрулло Убайдулло: Академик Бобоҷон Ғафуров, ки худ бешак дар саргаҳи омӯзиши илмии таърихи халқи тоҷик ва ташаккули таърихшиносии миллӣ меистод тва ин китобро дар шароити бениҳоят вазнин офарида буд. Бо таълифи ин асар ӯ ба оноҳое, ки   бо ҳар роҳу восита  тоҷиконро ҳамчун халқи соҳибтаъриху тамаддунофар ва сокинони аслии марзу буми минтақа нодида мегирифтанд,   зарбаи қотеъона зад.

Аз «Таърихи мухтасари халқи тоҷик», ки ҳанӯз соли 1947 бо забони тоҷикӣ нашр шуда буд ва баъдан шакли таҳкимёфта ва пурратари он бо забони русӣ (се маротиба дар Москва нашр шудааст) то нашри русии «Тоҷикон» (соли 1972) ва  нашри тоҷикии он  (солҳои 1983, 1985) дар такя ба консепсияи қавии илмӣ таърихи тӯлонии халқи тоҷик бо тамоми паҳлуҳояш ба риштаи тасвир кашида шудааст.

«Тоҷикон»-и Бобоҷон Ғафуров дар заминаи асноду далел, бо истифода аз сарчашмаю мадракҳои таърихӣ ва таҳлили дақиқонаи пажӯҳишҳои илмии таърихшиносию ховаршиносии ватанию хориҷӣ таълиф гардидааст.  Шоҳасари академик Бобоҷон Ғафуров ҳамчун асари бунёдии таҳқиқотӣ аз рӯзи аввал дар илми таърих ва ховаршиносии ҷаҳон мақоми арзанда ишғол намуд, ки шаҳодати ин чоп шудани тақризҳои зиёд аз тарафи олимони шинохта ва тарҷума гардидани он ба забонҳои гуногун дар давлатҳои хориҷӣ мебошад. Олими барҷаста, ки худ муддати зиёда аз 20 сол сарварии  Институти шарқшиносмии Академияи илмҳои собиқ СССР-ро ба зимма дошт ва тавонист  обрӯю нуфузи ин пажӯҳишгоҳи илмиро ба сатҳи ҷаҳонӣ барорад, ба таърихи миллати хеш аз мавқеи воқеият, бо асноду далели қавӣ дар чаҳорчӯбаи муқаррар намудаи илми замон ҳамчун ҷузъи таркибии таърихи умумибашарӣ  муносибат намудааст.

АМИТ «Ховар»:  Бале, Шумо дуруст мегӯед, академик Бобоҷон Ғафуров ягона олими тоҷик буд, ки ӯро чун сиёсатмадори варзида дар миқёси ҷаҳон, хусусан дар Шарқ хуб мешинохтанд. Бо ташаббус ва зери таҳрири ӯ танҳо бо забони англисӣ қариб 30 асар дар мавзӯъҳои муҳими таърихи мамлакатҳои Шарқ нашр гардидаанд… 

Насрулло Убайдулло: Ҳамин тавр аст, академик Бобоҷон Ғафуров таърихи халқи худро дар робита ба таърихи бою рангини Шарқ ва дар пайвастагӣ бо таърихи дигар сокинони минтақа таҳқиқ намуда, дар баробари тоҷикон нақши онҳоро низ дар рушди минтақа нишон додааст.

Бобоҷон Ғафуров бо чопи ин шоҳасар исбот намуд, ки тоҷикон дорои таърихи бениҳоят бой ва тӯлонӣ ҳастанд  ва ниёзе ба таърихи сохтаю бофта ё таҳрифи таърих надоранд. Ӯ дар ҳама ҳолат ҳангоми пажӯҳиши ин ё он масъала ҳадди муайяну заруриро нигоҳ медошт ва пайваста таъкид менамуд, ки «ҳадде ҳаст, ки аз он гузаштани таърихшинос мумкин нест, зеро агар вай аз ин ҳад гузарад,   таърихшинос не , балки қиссапардоз мешавад».

Олими шинохта тавассути асарҳои хеш, махсусан «Тоҷикон» ба мо ва оламиён саҳифаҳои таърихи бою рангини миллати тамаддунофари тоҷикро бо ҳама бурду бохташ нишон дода, муқаррар намуд, ки ин халқ дорои таърихи зиёда аз шашҳазорсола буда, сокинони аслии Хуросону Варорӯд, офарандагони тамаддуни минтақа ва оину суннатҳои наҷиби то имрӯз побарҷои аҷдодӣ мебошад. Тоҷикон дар масири таърих ҳамеша ҳамчун мардуми давлатсозу давлатдор, эҷодкору бунёдкор, тамаддунсозу сулҳофар ва дар баробари ин муборизи роҳи озодию истиқлолият, ҳомии марзу бум ва суннатҳои аҷдодӣ, забони модарӣ ва фарҳанги ниёкон тасвир ёфтаанд. Аз саҳифаҳои ин асар бармеояд, ки миллати тоҷик ҳамеша аз ҳама гуна гирдобу кӯрдуди замона, ки бисёрии он ҷонкоҳу камаршикан буд, на танҳо зиндаву саломат берун омад, балки дар фурсати ками ба даст омада аз нав қомат меафрохт ва эҳё мешуд.

АМИТ «Ховар»:  Вазъияти   ҷаҳони мутамаддин  тақозо мекунад, ки ҳар як шаҳрванди мамлакат бояд аз гузаштаи худ огоҳ бошад. Ба андешаи Шумо дар ҳимояи муқаддасоти милливу давлатӣ ва эҳёи сунннатҳои волои давлатдорию фарҳангӣ мо бояд бештар ба чӣ таваҷҷуҳ намоем?

Насрулло Убайдулло: Имрӯз дар шароити  соҳибистиқлолӣ, бунёди  давлати комилан нави миллӣ, эҳёи сунннатҳои волои давлатдорию фарҳангӣ моро зарур аст мисли академик Бобоҷон Ғафуров ба шинохти дурусти таърих, тарғиби мероси маънавӣ ва суннату ойинҳои мардумӣ, ки тайи асрҳо дар хотираи таърихии миллати тоҷик нақш бастаанд, боз бештар таваҷҷуҳ зоҳир намоем. Пешвои  миллат дар Паёми хеш ба Маҷлиси Олӣ бори дигар таъкид намуданд, ки дар шароити ҷаҳонишавӣ ва рушди технологияҳои иттилоотӣ, ки воридшавии унсурҳои бегонаро ба фарҳанги миллӣ осон гардонидааст, рӯ овардан ба таърих ва огоҳ будан аз аслу насаби хеш барои ҳар як фарди миллат, хусусан насли наврасу ҷавон зарур ва ҳатмӣ мебошад.

Дар ин росто бо мақсади омӯзиши амиқи таърихи пурифтихори халқи тоҷик пешниҳоди Пешвои миллат доир ба чопи «Тоҷикон»-и Бобоҷон Ғафуров аз ҳисоби Фонди Президенти Ҷумҳурии Тоҷикистон то ҷашни 30 – солагии Истиқлолияти давлатӣ ва аз номи Сарвари  давлат ба ҳар як оилаи мамлакат туҳфа шудани он иқдоми наҷибона ва хирадмандона мебошад.

Categorie: Tagikistan

Дар Донишгоҳи давлатии Хуҷанд бахшида ба 30-солагии Истиқлолияти давлатӣ Спартакидаи варзишӣ оғоз гардид

Ховар - 2 ore 41 min fa

ДУШАНБЕ, 24.01.2020. /АМИТ Ховар/. Бо ибтикори Раёсати Донишгоҳи давлатии Хуҷанд ба номи Бобоҷон Ғафуров ба истиқболи 30-солагии Истиқлолияти давлатии Ҷумҳурии Тоҷикистон таҳти унвони «Саломатӣ» Спартакиадаи варзишӣ оғоз гардид.

Мусобиқаи варзишӣ ҳамчунин ба 85-солагии Аълочии маорифи Ҷумҳурии Тоҷикистон, омӯзгори кафедраи тарбияи ҷисмонии донишгоҳи мазкур Шариф Ҳофизов бахшида шуда, ҳадафи он баланд бардоштани сатҳи варзишу тарбияи ҷисмонӣ дар ҷомеа ва тарғиби тарзи ҳаёти солим байни устодону профессорони донишгоҳ мебошад.

Тавре аз Раёсати донишгоҳ ба хабарнигори минтақавии АМИТ «Ховар» иттилоъ доданд, Спартакиадаи мазкур бори 29-ум аст, ки доир гардида, то 25 январ ҷараён мегирад.

Дар мусобиқа 18 даста аз ҳисоби кормандони раёсати донишгоҳ ва устодони факултетҳо аз рӯи 6 намуди варзиш, аз ҷумла, шоҳмот, шашка, дартс, волейбол, тенниси рӯимизӣ байни ҳам қувва меозмоянд. Дар интиҳои мусобиқа аз ҳисоби беҳтарин бозингарон дастаи донишгоҳ ҷиҳати иштирок дар Спартакиадаву мусобиқаҳои варзишии сатҳи шаҳрӣ, вилоятӣ ва ҷумҳуриявӣ байни муассисаҳои таълимии олӣ ва касбӣ интихоб карда мешавад.

Categorie: Tagikistan

Дар Душанбе шаҳраки нав — №163 бунёд мегардад

Ховар - 3 ore 41 min fa

ДУШАНБЕ, 24.01.2020 /АМИТ «Ховар»/.  Дар ҳудуди кӯчаҳои Шевченко, Бухоро ва Ҷалол Икромӣ шаҳраки 163 –юми шаҳри Душанбе  бунёд мегардад. Дар асоси супориши Раиси шаҳри Душанбе  Рустами Эмомалӣ  тибқи Нақшаи генералии  пойтахт Сарраёсати меъморӣ ва шаҳрсозии шаҳр нақшаи муфассали тарҳрезии шаҳраки 163 –ро  дар пойтахт  таҳия  намуд.  Бо  дастуру  супоришҳои  Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон  муҳтарам Эмомалӣ Раҳмон сохтмони биноҳои маъмурию истиқоматӣ дар шаҳраки  мазкур тибқи  талаботи муосири шаҳрсозӣ ба роҳ шуда, дар онҳо  унсурҳои меъмории миллӣ истифода мегарданд.

Дар ин бора  аз Раёсати иттилоот ва робитаҳои хориҷии дастгоҳи Раиси шаҳри Душанбе ба АМИТ «Ховар» хабар доданд. Масоҳати ҳудудҳои қитъаи тарҳрезишудаи шаҳраки мазкур  40,00 гектарро дар бар  гирифта, дар  5,80 гектари он биноҳои истиқоматӣ  бунёд мегарданд. Шумораи биноҳои истиқоматии дар ин макон бунёдшаванда 75 ададро ташкил медиҳад.

Тибқи иттилои муовини якуми Сарраёсати меъморӣ  ва шаҳрсозии шаҳри Душанбе Ҳусниддин Саидмуъминов, дар шаҳраки нав  дар  масоҳати  0,90 гектар  сохтмони биноҳои маъмурӣ, ки 7 ададро ташкил медиҳанд, ба нақша гирифта шудааст.  Ҳамчунин  дар масоҳати 0,70 га  сохтмони биноҳои иҷтимоӣ, ки шумораи онҳо 4 адад муқаррар гардидааст, дар назар аст.

«Дар  шаҳраки нави замонавӣ  дар  масоҳати 8,00 гектар   роҳҳои мошингард, 6,90 гектар  пиёдароҳҳо бунёд  мешаванд.  Ҳудуди   14,00 гектари шаҳраки нав сабзазор  мегардад. Бо инобати васеъшавӣ навсозии  муассисаи таҳсилоти миёнаи умумӣ №52,  боғчаи кӯдаконаи №73  «Садбарг» ва ду адад боғчаҳои кӯдаконаи лоиҳавӣ барои 150- нафарӣ,  муассисаҳои томактабӣ  барои 75 кӯдак (дар ошёнаҳои аввали биноҳои истиқоматӣ) ва  марказҳои хизматрасонии тиббии оилавӣ,  нозироти минтақавӣ  (дар ошёнаҳои аввали биноҳои лоиҳавӣ)  ба нақша гирифта шудаанд.

Дар шаҳраки замонавӣ биноҳои истиқоматии серқабата ва миёнаошёна, марказҳои  хизматрасонӣ, кӯдакистонҳо, майдончаҳои варзиш, майдонча барои бозии кӯдакон, айвону гулгаштҳои истироҳатӣ ва таваққуфгоҳи 1 ва 2-ошёнагӣ  бо фароҳам овардани шароити хуб барои зиндагии сокинони он  бунёд карда мешаванд.

Categorie: Tagikistan

Имрӯз дар Тоҷикистон зилзила ба қайд гирифта шуд

Ховар - 4 ore 4 min fa

ДУШАНБЕ, 09.10.2019 /АМИТ «Ховар»/. Имрӯз соати  12:09 ба вақти маҳаллӣ дар Тоҷикистон зилзила ба қайд гирифта шуд.

Тибқи иттилои Хадамоти геофизикии Академияи илмҳои Ҷумҳурии Тоҷикистон, маркази зилзила  дар  километри 260-уми қисмати шимолу шарқи  Душанбе, дар шарқи ноҳияи Лахш қарор дошта,  5 баллро ташкил дод.

Шиддати зилзила  тибқи ҷадвали Рихтер дар Душанбе 2 балл арзёбӣ гардид.

Дар бораи хисороти зилзила хабар нарасидааст.

Categorie: Tagikistan

ТАВАҶҶУҲ! Маркази барномаҳои байналмилалӣ қабули ҳуҷҷатҳоро барои таҳсил дар донишгоҳҳои Украина, Австрия ва Озарбойҷон эълон менамояд

Ховар - 4 ore 34 min fa

ДУШАНБЕ, 24.01.2020 /АМИТ «Ховар»/. Муассисаи давлатии «Маркази барномаҳои байналмилалӣ»-и Вазорати маориф ва илми Ҷумҳурии Тоҷикистон қабули ҳуҷҷатҳоро барои таҳсил дар донишгоҳҳои Украина, Австрия ва Озарбойҷон эълон менамояд. Дар ин бора АМИТ «Ховар» бо истинод ба Муассисаи давлатии «Маркази барномаҳои байналмилалӣ»-и Вазорати маориф ва илми Ҷумҳурии Тоҷикистон хабар медиҳад.

Тавре муассисаи мазкур ба маълумоти довталабон мерасонад, барои соли хониши 2020-2021 ҷиҳати таҳсили шаҳрвандони Ҷумҳурии Тоҷикистон дар муассисаҳои таҳсилоти олӣ ва илмии Украина  аз рӯи зинаҳои гуногуни таҳсил қабули ҳуҷҷатҳо оғоз гардидааст.

«Вазорати федеролии маориф, илм ва тадқиқоти Австрия озмуни нави стипендияҳоро ба номи «Френс Верфел», «Рихард Плашка»  ва «Эрнст Мах» барои хатмкунандагон, донишҷӯён ва олимон эълон намудааст», — омадааст дар эълони Маркази барномаҳои байналмилалӣ ва тазаккур дода шудааст, ки стипендияҳои мазкур дар давраи соли хониши 2020-2021 барои таҳсил дар донишгоҳҳои мухталифи Австрия ва бурдани корҳои илмӣ-тадқиқотӣ пешбинӣ гардидаанд. Маълумоти пурраро вобаста ба ин стипендияҳо метавон дар сомонаи www.grants.at пайдо намуд.

Ҳамчунин Маркази барномаҳои байналмилалӣ эълон менамояд, ки барои соли хониши 2020-2021 ҷиҳати таҳсили шаҳрвандони Ҷумҳурии Тоҷикистон дар муассисаҳои таҳсилоти олӣ ва илмии Ҷумҳурии Озарбойҷон аз рӯи зинаҳои гуногуни таҳсил қабули ҳуҷҷатҳо оғоз шудааст.

Барои маълумоти иловагӣ хоҳишмандон метавонанд ба Муассисаи давлатии «Маркази барномаҳои байналмилалӣ»-и Вазорати маориф ва илми Ҷумҳурии Тоҷикистон, воқеъ дар кӯчаи М. Турсунзода 47, шаҳри Душанбе муроҷиат намоянд ё бо телефонҳои 221-18-83, 223-23-57 дар тамос шаванд.

Categorie: Tagikistan

Физики маъруфи тоҷик, профессор Хурсандқул Ибодинов аз олам даргузашт

Ховар - 5 ore 46 min fa

ДУШАНБЕ, 24.01.2020/АМИТ «Ховар»/. Шаби гузашта узви вобастаи Академияи илмҳои Ҷумҳурии Тоҷикистон, астрофизики маъруф, собиқ директори Институти астрофизикаи АИ ҶТ Хурсандқул Ибодинов дар синни 76-солагӣ  аз олам даргузашт.

Хурсандқул Ибодинов   22 марти соли 1944 дар деҳаи Работи ноҳияи Айнии вилояти Суғд ба дунё омада, мактаби миёнаи деҳаи Такфонро ба итмом расонидааст. Соли 1964 факултети физикаю математикаи Донишгоҳи давлатии омӯзгории Душанбе ба номи Т. Г. Шевченкоро хатм намуда, ҳамон сол барои кор ба Институти астрофизикаи Академияи илмҳои Ҷумҳурии Тоҷикистон фиристода мешавад. Давоми солҳои 1965—1969 дар риштаи аспирантура таҳсил карда, аз соли 1967 то соли 1969 дар Институти физикаю техникаи ба номи А. Ф. Иоффеи АИ ИҶШС ба корҳои илмию тадқиқотӣ мағул гардидааст.

Хурсандқул Ибодинов соли 1972 рисолаи номзадӣ ва соли 1998 рисолаи докторӣ дифоъ намуда, соли 1975 сазовори унвони ходими калони илмӣ ва соли 1999 соҳиби унвони профессорӣ мегардад.

Профессор Х. Ибодинов   яке аз ташаббускорони кушодашавии ихтисос ва кафедраи нави астрономия дар ДМТ мебошад. Ӯ соли 1999 профессори кафедраи навтаъсиси астрономия буд ва солҳои 2002—2004 ва 2012—2014 сарварии кафедраи номбурдаро бар уҳда дошт. Аз соли 2002 то соли 2014 дар вазифаи директори Институти астрофизикаи АИ ҶТ фаъолият кардааст.  Қабл аз маргаш донишманди маъруф  мудирии шуъбаи кометаҳои институти мазкур ва профессори кафедраи астрономия буд.

Муҳимтарин дастоварди Хурсандқул Ибодиновро дар ҳалли проблемаи таҳаввули кометаҳо ва алоқамандии онҳо бо дигар ҷирмҳои Системаи офтобӣ дидан мумкин аст. Зеро ӯ яке аз асосгузорони самти нави астрофизика — астрофизикаи таҷрибавӣ ва муаллифи усулҳои  нави тадқиқоти кометаҳо  маҳсуб меёбад. Усулҳо  нави ҳалли масъалаи баръакси назарияи механикии шакли кометаҳо ва аз рӯи мушоҳидаҳо ошкор намудани механизми афзалиятноки ҳосилшавии чангро дар кометаҳо пешниҳод кардааст.

Ӯ нахсутин маротиба равандҳои мураккаби физикии каметаҳоро таҳқиқ намуда, ба ҷисмҳои астероидшакл табдил ёфтани як қисми каметаҳои кӯтоҳдаврро кашф кардааст. Вобастагии андозаи чангҳои думи кометаҳоро аз масофаи Офтоб ошкор намудааст. Назарияи таҷзияи ҳастаи думи каметаро ҳамчун системаи дутаркиба ва назарияи устувори динамикии қабати минералии сатҳи ядрои кометаро инкишоф ва  нишон додааст, ки ду тарзи таҳаввули минбаъдаи ҳастаи кометаҳо ҷой доранд. Ин хулосаҳои илмии Хурсандқул Ибодинов соли 2005 ҳангоми парвози киштиҳои кайҳонии «Вега» ва «Ҷотто» ба сӯи кометаи Ҳаллей тасдиқи амалии худро ёфтанд.

Доктори илмҳои физикаю математика (1998), профессор (1999), узви вобастаи АИ ҶТ (2008) Хурсандқул Ибодинов ҳамчунин узви Иттифоқи байналмилалии астрономӣ, Кумитаи байналмилалӣ оид ба тадқиқоти кайҳон, ҷамъиятҳои астрономии Аврупою Осиё ва роҳбари Ҷамъияти астрономҳои Тоҷикистон  буд.

Профессор Хурсанд Ибодинов муаллифи беш аз 150 асари илмӣ ва 5 дастури таълимию методӣ мебошад. Корҳои илмию тадқиқотҳои пурарзиши ин донишмандро дар соҳаи физикаи кометаҳо ба назар гирифта, сайёраи № 3436 аз ҷониби Кумитаи байналмилалӣ оид ба тадқиқоти кайҳон ба шарафи  насаби  ӯ Ибодинов (Ibadinov)  номгузорӣ шудааст.

 P.S. Маросими  ҷанозаи марҳум имрӯз соати 12:00 дар маҳаллаи 65, кӯчаи Фирдавсии шаҳри Душанбе баргузор мегардад.

                                                                               АКС аз бойгонии АМИТ «Ховар»

 

Categorie: Tagikistan

Рустами Эмомалӣ ба Палатаи ҳисоб ҷиҳати санҷиши фаъолияти мақомоти шаҳри Душанбе дар соли 2019 дархост ирcол намуд

Ховар - 5 ore 55 min fa

ДУШАНБЕ, 24.01.2020 /АМИТ «Ховар»/.  Раиси шаҳри Душанбе Рустами Эмомалӣ бо мақсади таъмини шаффофият ва самаранокии истифодаи мақсадноки маблағҳои буҷетии мақомоти иҷроияи ҳокимияти давлатии шаҳри Душанбе ба Палатаи ҳисоби Ҷумҳурии Тоҷикистон ҷиҳати санҷиши фаъолияти молиявию хоҷагидории мақомот дар соли 2019 дархост  ирcол  намуд.

Дар ин бора аз Раёсати иттилоот ва робитаҳои хориҷии дастгоҳи Раиси шаҳри Душанбе  ба АМИТ «Ховар» хабар доданд.

Тибқи иттилои  манбаъ,  ин бори аввал нест, ки Раиси шаҳри Душанбе бо мақсади таъмини шаффофият ва самаранокии истифодаи мақсадноки маблағҳои буҷетии мақомоти иҷроияи ҳокимияти давлатии шаҳри Душанбе  ба мақомоти дахлдор  дархост пешниҳод менамояд.

Categorie: Tagikistan

27 январ Вазорати энергетика ва захираҳои об, Вазорати кишоварзӣ ва Хадамоти алоқа нишасти матбуотӣ мегузаронанд

Ховар - 6 ore 20 min fa

ДУШАНБЕ, 24.01.2020 /АМИТ «Ховар»/. 27 январ Вазорати энергетика ва захираҳои оби Ҷумҳурии Тоҷикистон, Вазорати кишоварзии Ҷумҳурии Тоҷикистон,  Академияи илмҳои кишоварзии Тоҷикистон ва Хадамоти алоқаи назди Ҳукумати Ҷумҳурии Тоҷикистон оид ба ҷамъбасти соли 2019 нишасти матбуотӣ мегузаронанд.

Нишасти матбуотии Хадамоти алоқа соати 11:00 дар Маркази матбуоти ҷумҳуриявии АМИТ «Ховар» баргузор мешавад.

Вазорати кишоварзӣ дар якҷоягӣ бо Академияи илмҳои кишоварзӣ нишасти матбуотиро соати 14:00 дар толори ин вазорат доир менамояд.

Роҳбарияти Вазорати энергетика ва захираҳои об соати 16:00 бо намояндагони воситаҳои ахбори омма дар Маркази матбуоти ҷумҳуриявии АМИТ «Ховар» нишасти матбуотӣ мегузаронанд.

Хотиррасон менамоем, ки тибқи нақшаи Дастгоҳи иҷроияи Президенти Ҷумҳурии Тоҷикистон, масъулини вазорату идораҳо ва ташкилоту муассисаҳое, ки дар ҳудуди шаҳри Душанбе фаъолият мекунанд, вақти баргузории нишастҳои матбуотиро бо АМИТ «Ховар» ҷиҳати дар толори Маркази матбуоти ҷумҳуриявӣ  (хиёбони Рӯдакӣ, 40, ошёнаи 2, телефонҳои 221-34-24, 888-08-34-04) гузаронидан мувофиқа мекунанд.

Эълонҳо оид ба вақт ва макони баргузоршавии нишастҳои матбуотии вазорату идораҳо ва ташкилоту муассисаҳо ҳар рӯзи корӣ дар сомонаи АМИТ «Ховар»- www.khovar.tj  ба забонҳои тоҷикӣ ва русӣ нашр карда мешаванд.

Categorie: Tagikistan

Имрӯз дар Душанбе озмуни «Ҳунарҳои ороишӣ аз санг» гузаронида мешавад

Ховар - 6 ore 30 min fa

ДУШАНБЕ, 24.01.2020 /АМИТ «Ховар»/.  Нимаи  дуюми имрӯз бо ташаббуси мақомоти иҷроияи ҳокимияти давлатӣ дар шаҳри Душанбе  дар Муассисаи давлатии «Душанбе-Плаза»   озмуни «Ҳунарҳои ороишӣ аз санг» гузаронида мешавад. Дар он беҳтарин ҳунармандони соҳа аз  чор ноҳияи пойтахт маҳсули дасти хешро манзури  ҳакамон ва иштирокдорон мегардонанд.

Тавре аз Раёсати иттилоот ва робитаҳои хориҷии дастгоҳи Раиси шаҳри Душанбе ба АМИТ «Ховар» хабар доданд, бо қарори  Раиси шаҳр Рустами Эмомалӣ ҳайати Комиссияи шаҳрӣ барои муайян намудани ғолибони озмуни мазкур  тасдиқ гардидааст.

Хотиррасон мешавем, ки ин озмун  бо мақсади иҷрои банди 19-и «Ҷадвали баргузории фестивал, намоиш, ид ва озмунҳои анъана ва ҳунарҳои мардумӣ дар Ҷумҳурии Тоҷикистон барои солҳои 2019-2021», ки бо Амри Президенти Ҷумҳурии Тоҷикистон аз 13 декабри соли 2018  тасдиқ гардидааст,  роҳандозӣ мегардад.

Тибқи ин қарор масъулин  вазифадор гардидаанд, ки ҷиҳати дар сатҳи баланди ташкилӣ ва ғоявӣ баргузор намудани озмуни «Ҳунарҳои ороишӣ аз санг» тибқи низомномаи он, ки аз ҷониби Кумитаи рушди сайёҳии назди Ҳукумати Ҷумҳурии Тоҷикистон аз 2 апрели соли 2019 тасдиқ шудааст, тадбирҳои зарурӣ амалӣ намоянд.

Categorie: Tagikistan

«Паём — таҳкимбахши пояҳои забони тоҷикӣ», «Аз вайронии роҳ азоб мекашем», — шарҳи матбуоти даврӣ

Ховар - 7 ore 15 min fa

ДУШАНБЕ, 24.01.2020 /АМИТ «Ховар»/. Ҳафтаи гузашта матбуоти даврии Тоҷикистон кадом мавзӯъҳоро пайгирӣ намуд? Рӯзноманигорон  доир ба ҳодисоти дохил ва рӯйдодҳои берун аз мамлакат чӣ андеша доштанд? Дар ин мавзӯъ шарҳи АМИТ «Ховар» пешниҳоди хонандагони сомона мегардад.

Дар шумораи навбатии Нашрияи расмии Ҷумҳурии Тоҷикистон «Ҷумҳурият» (22.01.20, №16)  дар  баробари хабару гузоришҳои расмӣ  мақолаи  ректори Донишкадаи давлатии забонҳои Тоҷикистон ба номи Сотим Улуғзода Маҳмадулло Раҷабзода  зери унвони «Паём – таҳкимбахши пояҳои забони тоҷикӣ» ба нашр расидааст.

«Агар муҳтавои асосии андешаҳоеро, ки Сарвари давлат оид ба илму маориф, рушди фарҳанг ва масъалаҳои ба онҳо вобаста иброз намуданд, таҳлилу натиҷагирӣ намоем, онро метавон ба сифати барномаи стратегии рушди соҳаҳои номбурда арзёбӣ намуд. Инро дар мисоли рушди бомароми Донишкадаи давлатии забонҳои Тоҷикистон ба номи Сотим Улуғзода баръало мушоҳида кардан мумкин аст. Агар шумораи донишҷӯён дар донишкада соли таҳсили 2016-2017  2966 нафар бошад, соли таҳсили 2018-2019  3930 нафарро ташкил дод, ки дар қиёс бо соли таҳсили 2016-2017 ба андозаи 16 дарсад зиёд мебошад»,- зикр намудааст номбурда.

М.Раҷабзода ҳамчунин  иттилоъ додааст, ки  раёсати донишкада соли 2019 дар партави Амри Президенти Ҷумҳурии Тоҷикистон аз 9 феврали соли 2019 оид ба баргузор намудани Озмуни ҷумҳуриявии «Фурӯғи субҳи доноӣ…» дар факултети филологияи тоҷик китобхонаи илмиро бо фонди умумии беш аз 5 ҳазор китоб, аз ҷумла 1231 китоб бо забони русӣ, 787 китоб бо забонҳои дар донишкада омӯхташаванда ва 3082 китоб бо забони давлатӣ, инчунин 15 ҳазор китоби электронӣ таъсис додааст.

Нашрияи парлумонии мамлакат «Садои мардум»  (№10 аз 18.01.2020)    зери рубрикаи «Номаи бетаҳрир»   муроҷиати як гурӯҳ сокинони ноҳияи Хуросонро, ки ба унвони  рӯзнома ворид шудааст,   таҳти сарлавҳаи «Аз вайронии роҳ азоб мекашем» ба чоп додааст. Дар матлаб омадааст, ки  аз соли 1991 инҷониб  роҳ аз маркази ноҳияи Хуросон то деҳаи Имоми Аъзами деҳоти «Фахробод» то андозае мумфарш  гардидааст. Аз самти Фахробод то мавзеи Ёзӣ низ роҳ сангфаршу мумфарш шудааст,  вале дар байн 8 километр роҳ вайрону валангор боқӣ мондааст.

-Мо — сокинони деҳаҳои Баҳор, Наврӯз ва ба номи Нусратулло Махсуми ноҳияи Хуросон солҳои зиёд аст, ки аз вайронии роҳ азоб мекашем,- гуфтаанд муроҷиаткунандагон ва аз масъулин талаб намудаанд, ки дар навсозии роҳҳои зикршуда мусоидат намоянд.

Дар шумораи навбатии  нашрияи расмии Ҳукумати Ҷумҳурии Тоҷикистон — «Народная газета» (22.01.2020, №4)   гузориши муфассал аз маҷлиси васеи Ҳукумати Ҷумҳурии Тоҷикистон   таҳти раёсати Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон, Раиси Ҳукумати мамлакат муҳтарам Эмомалӣ Раҳмон, ки  20 январ дар шаҳри Душанбе  баргузор гардид,  нашр шудааст.

Ҳамзамон дар ин шумораи рӯзнома  фармонҳо, қарорҳои Ҳукумати Ҷумҳурии Тоҷикистон ва амрҳои Президенти мамлакат оид ба  тағйироти кадрӣ  рӯи чоп омадаанд.

Дар  рубрикаи  «Аз Паём то Паём» маводи васеъ зери сарлавҳаи  «Наука в Таджикистане: достижения и перспективы» ба чоп расидааст, ки  дар он дастовардҳои Академияи илмҳои   Ҷумҳурии Тоҷикистонро  Президенти он  Фарҳод Раҳимӣ   шарҳ додааст.

«Ихвон – ул -муслимин» и террористы возражденцы побратимы»- таҳти ин сарлавҳа мақолаи таҳлилӣ ба нашр расидааст, ки  дар он  оид ба амалҳои номатлуби ин  гурӯҳи экстремистӣ ва  оқибати  даҳшатбори  он ба ҷомеа  маълумот дода шудааст.

Ин навбат дар  «Народная газета» зери  рубрикаҳои «Об барои рушди устувор», «Интихобот-2020», «Солҳои рушди деҳот, сайёҳӣ ва ҳунарҳои мардумӣ», «маориф ва илм» ва  «75- солагии  ҶБВ» мақолаҳои ҷолибу хонданбоб ба нашр расидаанд.

Нашрияи  Кумитаи Иҷроияи  ҲХДТ дар шаҳри Душанбе «Мароми пойтахт»  дар шумораи  навбатӣ таҳти  сарлавҳаи  «Инъикоси Саразм дар ВАО: Аз мушкилот то воқеият» мулоҳизаҳои таърихшинос Ҷонибек Асрориёнро манзури хонандагон гардонидааст. Муаллифи матлаб, аз ҷумла, иброз медорад, ки «ин сарзамин асрори бузург дорад ва ҳар як бозёфт досто­нест. Аз ин рӯ, ҷоизае барои таърихшиносон созмон бояд дод. Мисли Ҷоизаи давлатии ба номи Бобоҷон Ғафуров. Чунки як олим кори сад рамзсозро  хоҳад кард ва дар ҳоле, ки  рақибонамон  хеле   афзудаанд. Ҳамзамон эътибори  бостоншиносонро мебояд ба­ланд бардошт. Ин ҷоиза  бояд  бо  унвони «Бостоншиноси  сол» муқаррар карда шавад, то ки  масъулиятро  дучанд ва  ҳавасмандонро  афзояд».

Ҳамзамон дар ин шумораи «Мароми пойтахт»   хонандагон мақолаҳои ҷолиберо бо номи  «Бенямин духтур шудан мехоҳад, то… »,  «Меросе аз ниёгон», «Занҷири илм бо истеҳсолотро мустаҳкам бояд кард» ва  «Лабханде, ки дилҳоро тасхир мекунад», ки   мавзӯъҳои гуногунро дар бар мегиранд,   метавонанд  мутолеа намоянд.

        Рухсораи НУР,
АМИТ «Ховар

Categorie: Tagikistan

Бори аввал намоиши нигораҳои таърихии тоҷикон дар Осорхонаи Гимеи шаҳри Париж баргузор мегардад

Ховар - 7 ore 35 min fa

ДУШАНБЕ, 24.01.2020. /АМИТ «Ховар»/. 14 октябр бори аввал Намоишгоҳи нигораҳои таърихии халқи тоҷик дар Осорхонаи Гимеи шаҳри Париж баргузор мегардад. Дар ин бора ба хабарнигори АМИТ «Ховар» аз маркази матбуоти Вазорати фарҳанги Ҷумҳурии Тоҷикистон хабар доданд.

Бино ба иттилои манбаъ, 23 январ Вазири фарҳанги Ҷумҳурии Тоҷикистон Шамсиддин Орумбекзода бо Сафири Ҷумҳурии Франсия дар Ҷумҳурии Тоҷикистон Ясмин Гуе мулоқот анҷом дод.

Зимни мулоқот ҷонибҳо оид ба таҳкими корҳои омодагӣ ба баргузории Намоишгоҳи нигораҳои таърихии халқи тоҷик дар Осорхонаи Гимеи шаҳри Париж табодули афкор намуданд.

Аз ҷумла, зикр гардид, ки барои бо сифати баланд анҷом додани  корҳои омодагӣ ба намоишгоҳ бояд гурӯҳи корӣ ҳар моҳ як бор ҷамъ шуда, масъалаҳои муҳимро баррасӣ намояд.

Тавре Ясмин Гуедар иброз дошт, «ин имконияти хубест, ки тавассути он тамоми зебоиҳои табиии ин давлат ва таърихи нотакрорашро ба мардуми Франсия нишон диҳем. Ман фикр мекунам, ки дар Париж Намоишгоҳи нигораҳои таърихии халқи тоҷикро бисёр меписанданд».

Ҳамчунин зимни мулоқот дигар масъалаҳо, мисли эълон намудани тендер барои интихоби ширкати ҳавопаймоӣ барои бурда расонидани нигораҳо ба Париж ва ширкате, ки бояд нигораҳоро борпеч намояд, инчунин масъалаи бехатарии нигораҳо баррасӣ гардиданд.

Ҳамзамон нашри феҳристи намоишгоҳ бо забонҳои гуногун, ташкили барномаи фарҳангӣ дар рӯзҳои баргузории намоишгоҳ ва намоиши филмҳои тоҷикӣ ё наворҳо оид ба мавзеъҳои таърихию сайёҳии Тоҷикистон мавриди баррасӣ қарор гирифтанд.

Ёдовар мешавем, ки 29 октябри соли 2017  Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа  Абдуҷаббор Раҳмонзода ва Вазири фарҳанги Ҷумҳурии Тоҷикистон, Раиси Комиссияи миллии Тоҷикистон оид ба корҳои ЮНЕСКО Шамсиддин Орумбекзода барои иштирок дар Конференсияи генералии ЮНЕСКО  ба Франсия сафар намуда буданд.

Зимни ин сафар вохӯрии ҳайати Ҷумҳурии Тоҷикистон бо намояндагони Вазорати корҳои хориҷӣ ва Вазорати фарҳанги Франсия, инчунин роҳбарияти Осорхонаи Гимеи Париж доир шуд. Зимни он ба нақша гирифта шуд, ки дар Осорхонаи Гимеи Париж намоиши нигораҳои таърихии Тоҷикистон доир гардад.

Categorie: Tagikistan

ДАР ВКХ КОР КАРДАН МЕХОҲЕД? Вазорати корҳои хориҷии Тоҷикистон барои ишғоли ҷойҳои кории холӣ озмун эълон намуд

Ховар - 7 ore 50 min fa

ДУШАНБЕ, 24.01.2020/АМИТ «Ховар»/. Вазорати корҳои хориҷии Ҷумҳурии Тоҷикистон барои ишғоли ҷойҳои кории холии зерин озмун эълон намуд:

  • мутахассиси Шуъбаи иттилоот, нашрияҳои чопӣ ва электронии Раёсати иттилоот ва матбуот – 1 ҷой;
  • мутахассиси Шуъбаи назорати коргузории Раёсати иттилооти умумӣ ва алоқаи дипломатӣ – 1 ҷой;
  • мутахассиси Раёсати молиявӣ – 1 ҷой;
  • мутахассиси Раёсати корҳо – 1 ҷой;
  • мутахассиси Шуъбаи дастгоҳи марказии Раёсати кадрҳо – 1 ҷой;
  • мутахассиси Шуъбаи Африкаи Раёсати кишварҳои Ховари Миёна ва Африка – 1 ҷой;
  • атташеи Раёсати хизматрасониҳои консулии Сарраёсати консулӣ – 1 ҷой;
  • атташеи Шуъбаи кишварҳои Осиёи Марказии Раёсати кишварҳои Иттиҳоди Давлатҳои Мустақил – 1 ҷой;
  • атташеи Шуъбаи созмонҳои байналмилалӣ ва минтақавии Раёсати созмонҳои байналмилалӣ – 1 ҷой;
  • атташеи Шуъбаи таҳияи сафарҳо ва маросимҳои Раёсати ташрифоти давлатӣ – 1 ҷой;
  • котиби сеюми Шуъбаи тадқиқоти стратегии Раёсати тадқиқоти стратегӣ – 1 ҷой;
  • котиби сеюми Шуъбаи кишварҳои Осиёи Раёсати кишварҳои Осиё ва Уқёнуси Ором – 1 ҷой;
  • котиби сеюми Шуъбаи кишварҳои Америкаи Раёсати кишварҳои Аврупо ва Америка – 1 ҷой;
  • котиби дуюми Шуъбаи ҷалби сармоя ва ҳамкорӣ бо ниҳодҳои молиявии Раёсати ҳамкориҳои иқтисодии хориҷӣ – 1 ҷой;
  • котиби дуюми Шуъбаи масъалаҳои ҳуқуқии Раёсати шартномавӣ-ҳуқуқӣ – 1 ҷой;
  • котиби дуюми Шуъбаи Созмони Ҳамкории Шанхай – 1 ҷой.

Музди меҳнати заминавӣ барои мансаби мутахассис – 804 сомонӣ;

Музди меҳнати заминавӣ барои мансаби атташе ва котиби сеюм – 1200 сомонӣ;

Музди меҳнати заминавӣ барои мансаби котиби дуюм – 1323 сомонӣ.

Талаботи тахассусӣ барои довталабони ишғоли мансаби котиби дуюм

—   таҳсилоти олии касбӣ, ихтисоси ба мансаби ишғолшаванда мувофиқ, ки иҷрои самараноки вазифаҳои мансаби мазкури маъмурии хизмати давлатиро таъмин карда метавонад;

—   на кам аз 3 сол собиқаи хизмати дипломатӣ ё на кам аз 4 сол собиқаи умумии хизмати давлатӣ;

—   донистани таърих, фарҳанг, муқаддасоти миллӣ, забони давлатӣ ва на кам аз ду забони хориҷӣ;

—   донистани самтҳои асосии сиёсати дохилӣ ва хориҷии Ҷумҳурии Тоҷикистон;

—   донистани Конститутсияи Ҷумҳурии Тоҷикистон, дигар қонунҳо ва санадҳои меъёрии ҳуқуқии соҳавӣ, инчунин санадҳои ҳуқуқии байналмилалии эътирофнамудаи Ҷумҳурии Тоҷикистон, ки иҷрои уҳдадориҳои мансабии мансаби мазкурро ба танзим медароранд;

—   мавҷудияти малакаи хуби муошират, аз ҷумла маҳорати ба роҳ мондани ҳамкорӣ ҳангоми татбиқи манфиатҳои давлатӣ;

—   кор карда тавонистан бо барномаҳои компютерӣ, Word, Excel, Power Point ва дигарҳо;

—   дорои донишу малака барои истифодабарии қонунгузории Ҷумҳурии Тоҷикистон дар соҳаи хизмати давлатӣ ва дипломатӣ.

Талаботи тахассусӣ барои ишғоли мансаби котиби сеюм

  • таҳсилоти олии касбӣ, ихтисоси ба мансаби ишғолшаванда мувофиқ, ки иҷрои самараноки вазифаҳои мансаби мазкури маъмурии хизмати давлатиро таъмин карда метавонад;
  • на кам аз 2 сол собиқаи хизмати дипломатӣ ё на кам аз 3 сол собиқаи умумии хизмати давлатӣ;
  • донистани таърих, фарҳанг, муқаддасоти миллӣ, забони давлатӣ ва на кам аз ду забони хориҷӣ;
  • донистани самтҳои асосии сиёсати дохилӣ ва хориҷии Ҷумҳурии Тоҷикистон;
  • донистани Конститутсияи Ҷумҳурии Тоҷикистон, дигар қонунҳо ва санадҳои меъёрии ҳуқуқии соҳавӣ, инчунин санадҳои ҳуқуқии байналмилалии эътирофнамудаи Ҷумҳурии Тоҷикистон, ки иҷрои уҳдадориҳои мансабии мансаби мазкурро ба танзим медароранд;
  • мавҷудияти малакаи хуби муошират, аз ҷумла маҳорати ба роҳ мондани ҳамкорӣ ҳангоми татбиқи манфиатҳои давлатӣ;
  • кор карда тавонистан бо барномаҳои компютерӣ, Word, Excel, Power Point ва дигарҳо;
  • дорои донишу малака барои истифодабарии қонунгузории Ҷумҳурии Тоҷикистон дар соҳаи хизмати давлатӣ ва дипломатӣ.

Талаботи тахассусӣ барои ишғоли мансаби атташе

  • таҳсилоти олии касбӣ, ихтисоси ба мансаби ишғолшаванда мувофиқ, ки иҷрои самараноки вазифаҳои мансаби мазкури маъмурии хизмати давлатиро таъмин карда метавонад;
  • на кам аз 1 сол собиқаи хизмати дипломатӣ ё на кам аз 2 сол собиқаи умумии хизмати давлатӣ;
  • донистани таърих, фарҳанг, муқаддасоти миллӣ, забони давлатӣ ва на кам аз ду забони хориҷӣ;
  • донистани самтҳои асосии сиёсати дохилӣ ва хориҷии Ҷумҳурии Тоҷикистон;
  • донистани Конститутсияи Ҷумҳурии Тоҷикистон дигар қонунҳо ва санадҳои меъёрии ҳуқуқии соҳавӣ, инчунин санадҳои ҳуқуқии байналмилаии эътирофнамудаи Ҷумҳурии Тоҷикистон, ки иҷрои ӯҳдадориҳои мансабии мансаби мазкурро ба танзим медароранд;
  • мавҷудияти малакаи хуби муошират, аз ҷумла маҳорати ба роҳ мондани ҳамкорӣ ҳангоми татбиқи манфиатҳои давлатӣ;
  • кор карда тавонистан бо барномаҳои компютерӣ, Word, Excel, Power Point ва дигарҳо;
  • дорои донишу малака барои истифодабарии қонунгузории Ҷумҳурии Тоҷикистон дар соҳаи хизмати давлатӣ ва дипломатӣ.

Талаботи тахассусӣ барои ишғоли мансаби мутахассис

  • таҳсилоти олии касбӣ, ихтисоси ба мансаби ишғолшаванда мувофиқ, ки иҷрои самараноки вазифаҳои мансаби мазкури маъмурии хизмати давлатиро таъмин карда метавонад;
  • донистани Конститутсияи Ҷумҳурии Тоҷикистон, таърих, фарҳанг, муқаддасоти миллӣ, забони давлатӣ ва на кам аз ду забони хориҷӣ, кор карда тавонистан бо барномаҳои компютерӣ Word, Excel, Power Point ва дигарҳо.

Талаботи иловагӣ нисбати ҳамаи довталабон:

  • донистани асосҳои муносибатҳои байналмилалӣ, вазъи байналмилалӣ ва минтақавӣ;
  • донистан ва риоя намудани қоидаҳои имлои забони тоҷикӣ;
  • малакаи тартиб ва омода намудани ҳуҷҷатҳои таҳлилӣ;
  • малакаҳои иловагии касбӣ, донистани ҳолати кунунии иқтисодии  кишвар, равандҳои байналмилалӣ ва минтақавӣ;
  • дониши ҳаматарафаи варзида дар робита ба ҳадафҳои стратегии кишвар;
  • унвони илмӣ, нашри мақолаҳои илмию тахассусӣ ва маводҳои таҳлилӣ (афзалият дода мешавад).

Хоҳишмандон метавонанд ба Раёсати кадрҳои Вазорати корҳои хориҷии Ҷумҳурии Тоҷикистон ҳуҷҷатҳои зеринро пешниҳод намоянд:

  1. 1. Ариза оид ба ишғоли ҷойҳои кории холӣ ба номи Вазири корҳои хориҷӣ;
  2. Саволномаи (анкета) шакли муқарраршуда;
  3. Тарҷумаи ҳол;
  4. 2 дона расми ранга (4,5 х 6,5);
  5. Нусхаи шиносномаи умумишаҳрвандӣ;
  6. Нусхаи ҳуҷҷатҳо оид ба маълумоти олӣ, такмили ихтисос ва унвони илмӣ (нусхаи диплом, шаҳодатнома ва ғ.);
  7. Нусхаи дафтарчаи меҳнатӣ;
  8. Маълумотномаи тиббии №038 (тибқи тартиби муайянгардида);
  9. Эъломия оид ба андоз аз даромад;
  10. Эъломия оид ба вазъи амволии хизматчии давлатӣ (барои шахсоне, ки дар хизмати давлатӣ қарор доранд);
  11. Тавсифнома аз ҷойи кор (аз муассисаи таълимӣ);
  12. Маълумотнома оид ба надоштани доғи судӣ;
  13. Нусхаи шаҳодатномаи ақди никоҳ/талоқ;

Ҳуҷҷатҳо то 11 феврали соли 2020 қабул карда мешаванд.

Суроға: ш.Душанбе, кӯчаи Шероз 33

Телефонҳо барои гирифтани маълумоти иловагӣ: 227-75-32; 221-70-27

Суроғаи электронӣ: [email protected]

Categorie: Tagikistan

Вазири меҳнат, муҳоҷират ва шуғли аҳолӣ бо Сафири Ҷумҳурии Корея дар Ҷумҳурии Тоҷикистон мулоқот намуд

Ховар - 7 ore 52 min fa

ДУШАНБЕ, 24.01.2020 /АМИТ «Ховар»/. 23 январ  Вазири меҳнат, муҳоҷират ва шуғли аҳолии Ҷумҳурии Тоҷикистон Гулрӯ Ҷабборзода бо  Сафири Ҷумҳурии Корея дар Ҷумҳурии Тоҷикистон Ли Вучёл  мулоқот намуд. Дар ин бора аз маркази матбуоти вазорати мазкур ба АМИТ «Ховар» хабар доданд.

Тибқи иттилои манбаъ, зимни мулоқот Гулрӯ  Ҷабборзода зикр кард, ки  ҳамкории судманд дар самти муҳоҷирати  меҳнатӣ  миёни Ҷумҳурии Тоҷикистон ва Ҷумҳурии Корея маҳз аз сафари Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Ҷумҳурии Корея  моҳи апрели соли 2015 сарчашма мегирад.

Тарафҳо ба дурнамои ҳамкории мутақобилан судманд, аз ҷумла интиқоли неруи корӣ таваҷҷуҳ намуда, масъалаи баимзорасонии лоиҳаи Созишнома байни Ҳукумати Ҷумҳурии Тоҷикистон ва Ҳукумати Ҷумҳурии Корея оид ба интиқоли қувваи корӣ ба Ҷумҳурии Кореяро, ки айни ҳол дар баррасии ин давлат  қарор дорад, муҳокима карданд.

Дар ин раванд Г.Ҷабборзода пешниҳод намуд, ки то муайян шудани мавқеи Корея ҷиҳати баимзорасонии лоиҳаи Созишномаи  мазкур, баррасӣ ва мавриди амал қарор гирифтани лоиҳаи Барнома байни Вазорати меҳнат, муҳоҷират ва шуғли аҳолии Ҷумҳурии Тоҷикистон ва музофоти дахлдори Ҷумҳурии Корея дар бораи фаъолияти меҳнатии мавсимии шаҳрвандони Тоҷикистон ба Корея тезонида шавад.

Инчунин зимни вохӯрӣ масъалаи тақвият бахшидани фаъолияти 62 муассисаи таҳсилоти ибтидоии касбии низоми вазорат мавриди муҳокима қарор гирифта, Ли Вучёл таъкид намуд, ки  дархостҳои қаблан пешниҳодгардидаи роҳбарияти вазорат ҷиҳати муҷаҳҳазгардонии муассисаҳои таҳсилоти ибтидоии касбӣ бо таҷҳизоти техникии муосир аз ҷониби Ҳукумати Ҷумҳурии Корея пазируфта шуда, бо ин мақсад 200 адад компютер чун кумаки техникӣ расонида шуд.

Вазир  барои кумаки техникӣ  миннатдорӣ баён намуда, ҷиҳати  тақвияти ҳамкорӣ бо Ҷумҳурии Корея дар масъалаҳои муҳоҷират, касбомӯзӣ, табодули таҷриба ва дигар самтҳои ба манфиати тарафҳо равонагардида изҳори назар намуд.

Вохӯрӣ дар фазои дӯстона ва ҳусни тафоҳум баргузор гардид.

Categorie: Tagikistan

ТОҶИКИСТОН ИҚТИСОДИЁТАШРО РАҚАМӢ МЕГАРДОНАД. Тибқи Консепсияи иқтисоди рақамӣ, ки аз ҷониби Ҳукумати мамлакат тасдиқ гардид, дар ин самт тадбирҳои дахлдор андешида мешаванд

Ховар - 7 ore 54 min fa

ДУШАНБЕ, 24.01.2020 /АМИТ «Ховар»/. 30 декабри соли 2019 бо Қарори Ҳукумати Ҷумҳурии  Тоҷикистон Консепсияи иқтисоди рақамӣ  дар Ҷумҳурии Тоҷикистон тасдиқ гардид.

Тасдиқи Консепсияи мазкур шаҳодати он аст, ки Тоҷикистон бо назардошти равандҳои рушди иқтисодиёти ҷаҳонӣ дар самти рақамикунонии иқтисодиёти миллии мамлакат заминаҳои бунёдӣ гузошта, тадбирҳои мушаххас  меандешад.

Дар асоси ин қарор ба вазорату идораҳо, мақомоти иҷроияи ҳокимияти давлатии  шаҳру вилоятҳои мамлакат дастур дода шуд, ки барои амалисозии Консепсия тадбирҳои мушаххас андешанд. Мусаллам аст, ки имрӯзҳо дар бархе  аз вазорату идораҳои мамлакат барномаю тарҳҳое, ки ба рушди рақамикунонии иқтисодиёти ҷумҳурӣ ва дар маҷмӯъ ба густариши ҳукумати электронӣ дар мамлакат нигаронида шудаанд, татбиқ мегарданд. Ҷорӣ гардидани корти нақлиётии «City card» дар нақлиёти мусофиркашонии пойтахт, хизматрасониҳои бонкӣ, пардохтҳои андозию гумрукӣ  ва ҳоказо мисоли барҷастаи ин гуфтаҳоянд.

Дар иртибот ба рушди Консепсияи  иқтисоди рақамӣ дар  мамлакат  ва афзалияти он дар густариши иқтисодиёти миллӣ ва дигар паҳлуҳои ин санад хабарнигори АМИТ «Ховар» Марзия САИДЗОДА бо сардори Раёсати таҳлили масъалаҳои макроиқтисодии Маркази тадқиқоти стратегии назди Президенти Ҷумҳурии Тоҷикистон, номзади илмҳои иқтисодӣ  Шаҳзода  ҚАЮМОВА суҳбат намуд.

АМИТ «Ховар»: Шаҳзода Тағоевна, лутфан бигӯед, ки иқтисоди рақамӣ чист?

Шаҳзода Қаюмова: Зери мафҳуми “иқтисоди рақамӣ”  фаъолияти иқтисодӣ дар асоси технологияҳои рақамии марбут ба тиҷорати электронии рақамӣ, хизматрасониҳои рақамӣ, тақвияти истеҳсолоти рақамӣ  дар назар  дошта мешавад. Рақамикунонии иқтисодиёт ба таъсиси модели нави идоракунии рақамӣ дар рушди иқтисодиёт, татбиқи навгониҳои рақамӣ дар истеҳсолот, ҷалби сармояи хориҷӣ, таҳкими тамоюли содиротӣ, тақвияти маҳсулоти воридотивазкунанда ва дарёфти роҳҳои хизматрасонии рақамӣ нигаронида шудааст.

Агар солҳои қаблӣ кишварҳои пешрафта табодули рақамиро дар доираи соҳаҳои алоҳида мавриди таҳлилу баррасӣ қарор медоданд, пас айни ҳол иқтисоди кишварҳои мутараққӣ пурра бо роҳи рақамӣ татбиқ мегардад. Рушди иқтисоди рақамӣ аз тамоми соҳаҳои иқтисодиёти миллӣ, бахусус кишоварзии рақамӣ ва комплекси агросаноатӣ, савдои рақамӣ, молияи рақамӣ, таҳсилоти рақамӣ, тибби рақамӣ, фарҳанги рақамӣ, экологияи рақамӣ вобастагӣ дошта, рақобатро дар ҳама самтҳо васеътар менамояд. Инчунин иқтисоди рақамӣ имкон медиҳад, ки тиҷорат ва хизматрасониҳои электронӣ бо дигар кишварҳо вусъат ёбанд.

Бо мақсади вусъат бахшидан ба иқтисодиёти миллӣ ва дар сатҳи иқтисоди ҷаҳонӣ муаррифӣ намудани он Консепсияи иқтисоди рақамӣ дар Ҷумҳурии Тоҷикистон дар асоси Паёми Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон «Дар бораи самтҳои сиёсати дохилӣ ва хориҷии Ҷумҳурии Тоҷикистон» аз 26 декабри соли 2018 ва мутобиқи қарори Ҳукумати Ҷумҳурии Тоҷикистон «Дар бораи ҷамъбасти натиҷаҳои рушди иҷтимоию иқтисодии Ҷумҳурии Тоҷикистон дар соли  2018 ва вазифаҳо барои соли 2019» таҳия ва бо қарори Ҳукумати Ҷумҳурии Тоҷикистон аз 30 декабри соли 2019 тасдиқ гардид.

АМИТ «Ховар»: Дар шароити муосири рушди иқтисодиёти ҷаҳонӣ иқтисоди рақамӣ чӣ ҷойгоҳе дорад?

Шаҳзода Қаюмова: Бо пешрафти илму техника ҷаҳони иқтисод низ бомаром тағйир меёбад. Аз ин ҷост, ки солҳои охир бо дарназардошти тағйирёбии авзои иқтисодию сиёсии ҷаҳон нақши технологияҳои муосир ва навгониҳои электронию рақамӣ дар идоракунии давлатӣ  бештар меафзояд. Технологияҳои навтарин метавонанд самаранокии истеҳсолот ва равандҳои тиҷоратро баланд бардоранд ва  баробари ворид шудани технологияҳои нав ба тамоми самтҳо соҳаҳои нави фаъолияти инсон метавонанд тағйир ёбанд.

Солҳои охир рушди технологияҳои нав ба пайдоиши бозорҳои бузурги алоқаи мобилӣ ва хизматрасониҳои интернет оварда расонид. Технологияҳои нав ба баъзе паҳлуҳои фаъолияти субъектҳои хоҷагидории муқарраршуда таъсири тағйирдиҳанда ворид мекунанд, ки асосан аз иваз кардани механизмҳои андоз бо рақамӣ (ё унсурҳои рақамӣ) ва инчунин такомули минбаъда иборатанд.

Рушди иқтисодиёти рақамӣ аз афзоиши бозорҳои мустақим бо технологияҳои рақамӣ ва мобилӣ вобаста буда, тиҷорати онлайн (тиҷорати электронӣ), хизматрасонии молиявӣ (масалан, онлайн-банкинг), хидматрасонии интернети иҷтимоӣ (шабакаҳои иҷтимоӣ, ҷараёнҳои онлайн, бозиҳои онлайнӣ), маориф, тандурустӣ (кортҳои электронии амбулаторӣ, саломатии рақамӣ), инчунин хизматҳои давлатиро дарбар мегирад.

АМИТ «Ховар»: Бигӯед, ки тибқи консепсияи зикршуда Ҷумҳурии Тоҷикистон дар самти гузариш ба иқтисоди рақамӣ кадом тадбирҳоро меандешад?

Шаҳзода Қаюмова: Бо мақсади марҳала ба марҳила амалӣ намудани Консепсияи иқтисоди рақамӣ таъсиси Шӯро доир ба рушди иқтисоди рақамӣ дар назди Президенти Ҷумҳурии Тоҷикистон  дар назар дошта шудааст, ки маҳз иҷрои механизмҳои рақамии пешбурди мониторинги вазифаҳои гузошташуда, қабул ва коркарди алоқаи баръакс, механизми санҷиш ва ҳисоботдиҳии электронӣ, арзёбии истифодабарандагони рақамӣ ва сифати хизматрасониро назорат менамояд.

Барои татбиқи иқтисоди рақамӣ дар Консепсия се марҳила муайян гардидаанд.  Марҳилаи якум то соли 2025 идома ёфта, он бо роҳи татбиқи ҳукумати электронӣ дар ин се марҳила амалӣ карда мешавад. Дар ин раванд гузаштан ба модели идоракунии электронӣ тавассути муросилоти ҳуҷҷатҳо, омода намудани кадрҳои соҳибтахассус, таъсиси модели идоракунии табодули рақамӣ, муайян кардани нишондиҳандаҳои калидии мақсадноки дастовардҳои табодули рақамӣ ва маблағгузорӣ барои ташаккули иқтисоди рақамӣ дар назар дошта шудааст.

Марҳилаи дуюм то соли 2030 идома меёбад. Дар ин давра  дастрасии фарохмавҷ, амнияти иттилоотӣ, кибернетикӣ ва технологияҳои абрӣ, таъсиси платформаҳо ва рушди хизматрасонии рақамӣ ва  оғози лоиҳаҳои пилотӣ бояд таъмин карда шаванд.

Марҳилаи сеюм ва ниҳоии табодули рақамӣ давраи то соли 2040-ро дарбар гирифта, ба таҳкими минбаъдаи асосҳои ғайрирақамӣ ва рақамӣ дар ҷумҳурӣ, оғози лоиҳаҳои рақамӣ дар соҳаҳои иҷтимоӣ мутобиқи афзалиятҳои дар Стратегияи миллии рушд барои давраи то соли 2030 пешбинигардида, дар навбати аввал дар соҳаҳои кишоварзӣ, энергетика, телекоммуникатсия, нақлиёт, соҳаи хизматрасонӣ, фарҳанг, маориф, тандурустӣ, саноат, аз ҷумла истихроҷи маъданҳои кӯҳӣ ва савдо  бахшида мешавад.

АМИТ «Ховар»: Бояд гуфт, ки дар масъалаи рақамикунонии иқтисодиёт бисёре аз кишварҳои ҷаҳон муваффақ гардидаанд. Ба андешаи Шумо дар ин самт барои Ҷумҳурии Тоҷикистон истифодаи таҷрибаи кадоме аз давлатҳои хориҷӣ  манфиатноктар аст?

Шаҳзода Қаюмова: Бале, дуруст мегӯед, айни ҳол иқтисоди рақамӣ дар   Британияи Кабир, Кореяи Ҷанубӣ, Чин, Япония, Амрико, Дания, Финландия, Сингапур ва Эстония  хеле пеш рафтааст. Имрӯз мо бояд пеш аз ҳама таҷрибаи давлатҳои мазкурро таҳти омӯзиш қарор дода, ташаккули иқтисоди рақамиро дар мамлакат дар ҳама самтҳо дар сатҳи баланд ва замонавӣ ба роҳ монем.

Чуноне меедонем, технологияҳо  дар замони муосирн  бо суръати   хеле баланд  рушд мекунанд, ки истифодаи дурусти онҳо рақобатнокии миллиро дар асри ХХI  муайян менамояд. Тамоюли ивазшавии қолабҳои рақамӣ муайян менамояд, ки кишварҳои пешрафта қаблан табодули рақамиро дар доираи соҳаҳои алоҳида баррасӣ менамуданд, вале имрӯз иқтисоди миллии кишварҳои пешрафта пурра ба роҳи рақамӣ гузаштаанд. Ин тамоюл кишварҳои дигари рӯ ба рушд ва дар ҳоли рушд, бахусус Ҷумҳурии  Тоҷикистонро низ водор месозад, ки ба ҷараёни рақамикунонии иқтисодиёти миллӣ гузаранд.

АМИТ «Ховар»: Барои рушди рақамикунонии иқтисодиёти мамлакат кадом заминаҳои мусоид мавҷуданд?

Шаҳзода Қаюмова: Бо мақсади баланд бардоштани сатҳи маърифати техникии қишрҳо ва сохторҳои гуногуни ҷомеа ва ҳамаҷониба татбиқ намудани технологияҳои иттилоотиву коммуникатсионӣ дар иқтисоди миллии мамлакат як зумра  стратегияҳо, консепсияҳо ва барномаҳо қабул ва мавриди амал  қарор дода шудаанд. Аз ҷумла, Стратегияи давлатии «Технологияҳои иттилоотию коммуникатсионӣ барои рушди Ҷумҳурии Тоҷикистон», ки бо Фармони Президенти Ҷумҳурии Тоҷикистон аз 5 ноябри соли 2003, «Барномаи давлатии рушд ва татбиқи технологияҳои иттилоотию коммуникатсионӣ дар Ҷумҳурии Тоҷикистон», ки бо қарори Ҳукумати Ҷумҳурии Тоҷикистон аз 3 декабри соли 2004, Консепсияи сиёсати давлатии иттилоотии Ҷумҳурии Тоҷикистон, ки бо Фармони Президенти Ҷумҳурии Тоҷикистон аз 30 апрели соли 2008 ва Стратегияи ислоҳоти системаи идораи давлатии Ҷумҳурии Тоҷикистон, ки бо Фармони Президенти Ҷумҳурии Тоҷикистон аз 15 марти соли 2006, Консепсияи ташаккули ҳукумати электронӣ дар Ҷумҳурии Тоҷикистон, ки бо қарори Ҳукумати Ҷумҳурии Тоҷикистон аз 30 декабри соли 2011тасдиқ гардидаанд.   Дар ин самт тадбиқи босамари Консепсияи ташаккули ҳукумати электронӣ барои амалӣ намудани ҳадафҳо дар  ҷиҳати ба вуҷуд овардани  иқтисодиёти рақамӣ мусоидат менамояд.

Дар Паёми навбатии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба Маҷлиси Олӣ таъкид гардидааст, ки «минбаъд ба ҷанбаҳои сифатии рушди иқтисоди миллӣ, тақвияти неруи инсонӣ, бо истифода аз технологияҳои муосир ва ҷорӣ намудани инноватсия вусъат додани истеҳсоли маҳсулоти ниҳоӣ, баланд бардоштани фаъолнокии иқтисодии аҳолӣ, такмили низоми дастгирии соҳибкориву сармоягузорӣ ва тавсеаи иқтисодиёти рақамӣ диққати аввалиндараҷа дода шавад».

Барои татбиқи босамари иқтисоди рақамӣ ширкати фаъолонаи мақомоти маҳал, сохторҳои давлатӣ, соҳибкорону сармоягузорон, зиёиён, ҷомеаи шаҳрвандӣ, ниҳодҳои илмию таълимӣ ва дигар узвҳои фаъоли ҷомеа хеле муҳим арзёбӣ мегардад.

Масъалаҳои барои рушди миллӣ басо муҳим, ба монанди таъмини дурнамои нишондиҳандаҳои макроиқтисодии мамлакат, дар заминаи саноатикунонии ҷумҳурӣ таъсиси ҷойҳои нави корӣ ва дар ниҳоят рақобатпазирии Тоҷикистон дар шароити рақамисозии иқтисодиёт, пеш аз ҳама, ба ташаккули захираҳои инсонӣ вобастагии калон доранд.

                                                      Мусоҳиб
Марзия САИДЗОДА,
АМИТ  «Ховар»

Categorie: Tagikistan

Вазири корҳои хориҷии Тоҷикистон Сафири Франсияро ба ҳузур пазируфт

Ховар - 8 ore 25 min fa

ДУШАНБЕ, 24.01.2020 /АМИТ «Ховар»/. 23 январ Вазири корҳои хориҷии Ҷумҳурии Тоҷикистон Сироҷиддин Муҳриддин Сафири Фавқулода ва Мухтори Ҷумҳурии Франсия дар Ҷумҳурии Тоҷикистон Ясмин Гуедарро ба ҳузур пазируфт. Дар ин бора АМИТ «Ховар» бо истинод ба Вазорати корҳои хориҷии Ҷумҳурии Тоҷикистон хабар медиҳад.

Дар ҷараёни мулоқот масъалаҳои муносибатҳои дуҷонибаи Тоҷикистону Франсия дар заминаҳои гуногун, аз ҷумла натиҷаҳои сафари расмии Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Франсия 7-12 ноябри соли 2019 баррасӣ шуда, дар бораи мавзӯъҳои дигари мавриди эҳтимоми муштарак табодули назар сурат гирифт.

Акс аз ВКХ ҶТ

Categorie: Tagikistan

Дастаи наврасони то 16-солаи Тоҷикистон оид ба футбол ба финали «Ҷоми рушд-2020» баромад

Ховар - 8 ore 42 min fa

ДУШАНБЕ, 24.01.2020 /АМИТ «Ховар»/. Дастаи наврасони то 16-солаи Тоҷикистон оид ба футбол дар даври ниҳоии бозиҳои гурӯҳии Мусобиқаи байналмилалии «Ҷоми рушд-2020», ки дар Мински Беларус ҷараён дорад, бар дастаи Гурҷистон бо ҳисоби 2:1 ғалаба карда, ба финал баромад. Дар ин бора АМИТ «Ховар» бо истинод ба Федератсияи футболи Тоҷикистон хабар медиҳад.

Дар вохӯрӣ бо дастаи Гурҷистон голҳоро дар ҳайати Тоҷикистон Алиҷони Айнӣ дар дақиқаи 36 ва Суннатулло Азизов дар дақиқаи 77 ба нишон расониданд.

Дар финал дастаи наврасони Тоҷикистон бо дастаи мизбон- Беларус рақобат мекунад. Ин дидор 25 январ, соати 18:45 ба вақти Душанбе оғоз мегардад.

Шогирдони Аҳлиддин Турдиев дар даври аввал бар дастаи Исландия пирӯз шуда (2:1), дар даври дуюм аз дастаи Исроил шикаст (0:4) хӯрда буданд.

Дар бозии дигари гурӯҳ дастаи Исландия бар Исроил бо ҳисоби 2:0 ғалаба кард. Ҳамин тариқ, дар гурӯҳи «В» Тоҷикистон бо 6 хол ҷои аввалро ишғол кард. Исландия ва Гурҷистон бо 4-холӣ мутаносибан дар ҷойҳои дуюму сеюм, Исландия бо се хол дар зинаи чорум мавқеъ гирифтанд.

Мусобиқаи байналмилалии «Ҷоми рушд-2020»

Гурӯҳи «В»

Даври 1-ум

Исландия (U-17) – ТОҶИКИСТОН (U-16) – 1:2

Голҳо: Абдулфаттоҳ Худойдодзода, 27 (0:1). Даниэл Деян Ҷурич, 50 – аз пеналтӣ (1:1). Сунатулло Азизов, 75 (1:2).

Исроил (U-17) – Гурҷистон (U-17) – 1:1

Даври 2-юм

Исроил (U-17) – Тоҷикистон (U-16) – 4:0

Гурҷистон (U-17) – Исландия (U-17) – 1:0

Даври 3-юм

ТОҶИКИСТОН (U-16) – Гурҷистон (U-17) – 2:1

Голҳо: Торнике Дундлия, 13 (0:1), Алиҷони Айнӣ, 36 (1:1), Суннатулло Азизов, 77 (2:1).

Исландия (U-17) – Исроил (U-17) – 2:0

Гурӯҳи «А»

Даври 1-ум

Белгия (U-17) – Финландия (U-17) – 2:1

Беларус (U-17) – Ӯзбекистон (U-16) – 4:1

Даври 2-юм

Белгия (U-17) – Ӯзбекистон (U-16) – 2:1

Финландия (U-17) – Беларус (U-17) – 1:2

Бозиҳои минбаъда

Даври 3-юм

23 январ (панҷшанбе)

18:20 – Ӯзбекистон – Финландия — 1:2

20:30 – Беларус – Белгия — 1:1

25 январ (шанбе)

Бозӣ барои ҷои 7-ум

12:00 – Ӯзбекистон – Исландия

Бозӣ барои ҷои 5-ум

14:15 – Финландия – Гурҷистон

Бозӣ барои ҷои 3-юм

16:30 – Белгия – Исроил

Финал

18:45 – Беларус – ТОҶИКИСТОН (U-16)

 

Categorie: Tagikistan

Имрӯз дар Душанбе иҷлосияи ғайринавбатии Маҷлиси миллии Маҷлиси Олии Ҷумҳурии Тоҷикистон, даъвати панҷум баргузор мешавад

Ховар - 8 ore 43 min fa

ДУШАНБЕ, 24.01.2020 /АМИТ «Ховар»/. Имрӯз, соати 16:00, дар шаҳри Душанбе иҷлосияи ғайринавбатии Маҷлиси миллии Маҷлиси Олии Ҷумҳурии Тоҷикистон, даъвати панҷум баргузор мегардад. Дар ин бора АМИТ «Ховар» бо истинод ба дастгоҳи Маҷлиси миллии Маҷлиси Олии Ҷумҳурии Тоҷикистон хабар медиҳад.

Аъзои Маҷлиси миллии Маҷлиси Олии Ҷумҳурии Тоҷикистон 24 январи соли 2020 аз соати 8:00 то соати 15:00 дар бинои Маҷлиси миллии Маҷлиси Олии Ҷумҳурии Тоҷикистон, ошёнаи сеюм, утоқи кори шуъбаи ташкилӣ ба қайд гирифта мешаванд.

Ёдовар мешавем, ки дирӯз Фармони Президенти Ҷумҳурии Тоҷикистон дар бораи даъват намудани иҷлосияи ғайринавбатии Маҷлиси миллии Маҷлиси Олии Ҷумҳурии Тоҷикистон, даъвати панҷум ба тасвиб расида буд.

Телефонҳо барои маълумот: 221-98-35; 221-12-47

АКС аз бойгонӣ

Categorie: Tagikistan

ОБУ ҲАВО: Имрӯз дар Тоҷикистон ҳавои номусоид шуда, борон ва барф меборад

Ховар - 8 ore 50 min fa

ДУШАНБЕ, 24.01.2020. /АМИТ «Ховар»/.  24 январ дар ҷумҳурӣ номусоидии вазъи ҳаво боқӣ монда, дар водиҳо борону барф ва дар доманакўҳҳо барф меборад. Дар  баъзе ноҳияҳои кўҳии навоҳии тобеи марказ боришот шиддат мегирад. Фаромадани туман аз эҳтимол дур нест.  Дар ин бора аз Агентии обуҳавошиносии Тоҷикистон ба АМИТ «Ховар» хабар доданд.

Ба иттилои Агентии обуҳавошиносӣ, имрӯз дар Вилояти Мухтори Кӯҳистони Бадахшон ҳаво абрнок шуда, дар баъзе ноҳияҳои ғарбии вилоят барф меборад.  Дар  шарқи вилоят боридани барфи суст  дар назар аст.  Шамол аз самти ғарб  бо суръати 2-7 метр дар як сония мевазад. Ҳаво дар ғарби вилоят   шабона  9-14 ва рӯзона аз 4 дараҷа хунук то 1 дараҷа гарм мешавад. Дар  шарқи вилоят  ҳаво шабона 24-29 ва рӯзона 10-15 дараҷа хунук мешавад.

Ҳаво дар вилояти Суғд  абрнок шуда, дар баъзе ноҳияҳои водигӣ боришоти сусти борон ва  барф ба амал меояд.  Дар  ноҳияҳои доманакӯҳӣ ва кӯҳӣ барф борида,  туман мефарояд. Шамол  аз самти ғарб бо суръати  3-8 метр дар як  сония мевазад. Ҳаво дар водиҳо шабона аз 2 дараҷа хунук то 3 дараҷа гарм ва рӯзона 2+7 дараҷа гарм  мешавад. Дар ноҳияҳои кӯҳӣ ҳаво шабона 6-11 дараҷа хунук  ва   рӯзона аз 3 дараҷа хунук то 2 дараҷа гарм мешавад.

Дар вилояти Хатлон   ҳавои абрнок шуда, дар  ноҳияҳо борон ва барф меборад. Дар  баъзе ноҳияҳо туман мефарояд. Шамол аз самти ғарб бо суръати  3-8 метр дар як сония мевазад. Ҳаво дар водиҳо ҳаво шабона аз 2 дараҷа хунук то 3 дараҷа гарм ва рӯзона 3+8 дараҷа гарм мешавад. Дар  доманакӯҳҳо ҳаво шабона 1-6 дараҷа хунук ва рӯзона аз 2 дараҷа хунук то 3 дараҷа гарм мешавад.

Дар шаҳру ноҳияҳои тобеи марказ ҳавои абрнок дар назар буда, дар  ноҳияҳои водигӣ борону барф ба амал меояд.  Дар  ноҳияҳои кӯҳӣ барф бошиддат борида, туман мефарояд. Шамол аз самти ғарб бо суръати 3-8  метр дар як сония  мевазад.  Ҳаво  дар водиҳо  шабона аз 1 дараҷа хунук то 4 дараҷа гарм ва рӯзона 2+7 дараҷа гарм мешавад. Дар  ноҳияҳои кӯҳӣ ҳаво шабона 5-10 дараҷа хунук  ва  рӯзона аз 3 дараҷа хунук  то 2  дараҷа гарм мешавад.

Дар  шаҳри Душанбе ҳаво абрнок шуда, дар баъзе ҳолатҳо боришоти борон ва  барфи тар ба қайд гирифта мешавад. Туман  мефарояд. Шамол аз самти ғарб бо суръати 2-7  метр дар як сония   мевазад. Ҳаво шабона аз 1 дараҷа хунук то 1 дараҷа гарм  ва  рӯзона 4+6 дараҷа гарм мешавад.

Categorie: Tagikistan

ТАҚВИМИ АМИТ «ХОВАР»: имрӯз 24 январ, ҷумъа, 24-умин рӯзи соли 2020 аст

Ховар - 8 ore 54 min fa

24 январи соли 2013 дар шаҳри Душанбе таҳти раёсати Президенти Ҷумҳурии Тоҷикистон, Раиси Шӯрои амнияти мамлакат муҳтарам Эмомалӣ Раҳмон ҷаласаи Шӯрои амнияти Ҷумҳурии Тоҷикистон доир ба натиҷаҳои фаъолият дар соли 2012 ва вазифаҳо барои соли 2013 баргузор гардид.

***

6 сол пеш, 24 январи соли 2014 дар шаҳри Душанбе масоили вақт ва дурнамои ҳамкории мутақобиланд судманду гуногунҷанбаи Тоҷикистону Россия муҳокима карда шуданд.

***

Дар ин рӯзи соли 2014 пас аз анҷоми ҷаласаи 12-уми байниҳукуматии Тоҷикистону Россия оид ба ҳамкории тиҷоратӣ-иқтисодӣ шартномаи муштарак оид ба ҳамкории дуҷониба ба имзо расид.

 24 ЯНВАР ТАҶЛИЛ КАРДА МЕШАВАД:

Рӯзи байналмилалии эскимо.

***

Дар Британияи Кабир – Рӯзи ёдбуди қурбониёни генотсид  (қатли ом бо баҳонаҳои нажодӣ, миллӣ ва динӣ)  дар Ҷанги дуюми ҷаҳон.

***

Дар Ҳиндустон – Рӯзи миллии духтарон.

 РӮЙДОДҲО:

 24 январи соли 2008 Стратегияи мубориза бо коррупсия дар Ҷумҳурии Тоҷикистон барои солҳои 2008-2012 қабул гардид.

 ***

24 январи соли 2010 намояндагии дипломатии Шоҳигарии Арабистони Саудӣ фаъолияти худро дар Ҷумҳурии Тоҷикистон оғоз намуд.

***

6 сол пеш, 24 январи соли 2014 дар шаҳри Санкт-Петербурги Федератсияи Россия бозии кушодашавии Ҷоми «Иттиҳод-2014» миёни дастаҳои Тоҷикистон ва Эстония бо натиҷаи мусовӣ – 2:2 ба анҷом расид.

***    

Дар ин рӯзи соли 2017 дар Сафорати Япония дар Душанбе маросими баимзорасии 10 лоиҳаи нави Барномаи Ҳукумати Япония оид ба кумаки бебозгашт ва бехатарии гуманитарӣ барои ҳамаи қишрҳои  аҳолӣ ба имзо расид.

***

3 сол пеш, 24 январи соли 2017 Канслери Германия Ангела Меркел гуфт, ки ҷаҳон ба марҳилаи нави таърихӣ шомил мешавад.

  ИНЧУНИН ДАР ИН РӮЗ …

 Соли 1939 дар Чили заминҷунбии шадид ба амал омад, ки дар натича зиёда аз 50 ҳазор нафар ба ҳалокат расиданд.

***

Соли 1946 Комиссияи СММ оид ба энергияи атомӣ таъсис дода шуд.

Тақвими моро дар ин гӯша

шореҳ Шукӯҳи ДАЛЕР варақ мезанад

 

Categorie: Tagikistan