Laos

    ທ່ານ ດຣ ພອນປະເສີດ ອຸນາພົມ ຫົວໜ້າກົມອະນາໄມ ແລະ ສົ່ງເສີມສຸຂະພາບ ກະຊວງສາທາລະນະສຸກ ຖະແຫຼງຂ່າວວັນທີ 24 ມິຖຸນາ 2021 ທີ່ກະຊວງສາທາລະນະສຸກວ່າ: ມາຮອດປັດຈຸບັນ ການສັກຢາວັກຊິນຢູ່ ສປປ ລາວ ເຮົານໍາໃຊ້ມີ 4 ຊະນິດຄື: ຊິໂນຟາມ ສະປຸດນິກ ແອັສຕຣາເຊເນກາ  ແລະ ໄຟເຊີ ໃນນັ້ນ ທັງ 4 ຊະນິດນີ້ ເຮົາໄດ້ມີຢາທັງໝົດ 2.135.620 ໂດສ ຜ່ານການຈັດຕັ້ງປະຕິບັດມາຮອດປັດຈຸບັນ ສາມາດສັກເຂັມທີ 1 ໃຫ້ປະຊາຊົນໄປແລ້ວ 853.782 ຄົນ ກວມເອົາປະມານ 11, 64%ແລະ ເຂັມທີ 2 ສັກໄດ້ 494.477ຄົນ ກວມເອົາ 6,7% ໂດຍຜ່ານການສັກ ກໍເຫັນວ່າຢາຊະນິດດັ່ງກ່າວແມ່ນມີຄວາມປອດໄພທີ່ສຸດສຳລັບປະຊາຊົນລາວ.

     ລັດຖະບານລາວ ມີຄວາມມຸ່ງໝັ້ນຈະສູ້ຊົນເຮັດໃຫ້ອັດຕາການສັກວັກຊິນປ້ອງກັນພະຍາດໂຄວິດ 19 ໃຫ້ກວມໄດ້ 50% ຂອງປະຊາກອນ ສະນັ້ນ ຈະຕ້ອງສັກໃຫ້ໄດ້ 3.700.000 ຄົນ ເບື້ອງລັດຖະບານ ໄດ້ປະສານກັບອົງການສາກົນປະເທດເພື່ອນມິດ ແລະ ພາກເອກະຊົນ ເພື່ອເຂົ້າມາມີສ່ວນຮ່ວມໃນການຈັດຊື້ຈັດສັນຫາວັກຊິນ ເພື່ອມາສັກໃຫ້ປະຊາຊົນທຸກພາກສ່ວນໃນສັງຄົມໃຫ້ສາມາດບັນລຸຕາມຄາດໝາຍໃຫ້ຫຼາຍຂຶ້ນ ເຊິ່ງປັດຈຸບັນ ສປປ ລາວ ເຮົາມີໂຄຕາທີ່ຈະໄດ້ຮັບວັກຊິນທັງໝົດ 6.606.084 ໂດສ ແຕ່ຍ້ອນການຈັດສັນວັກຊິນນັ້ນ ອາດຈະບໍ່ຕອບສະໜອງໄດ້ຕາມຄວາມຕ້ອງການຂອງປະເທດເຮົາ ເຖິງຢ່າງໃດກໍຕາມ ພັກ ແລະ ລັດຖະບານ ສປ ຈີນ ໄດ້ມີຄວາມເປັນຫ່ວງເປັນໄຍຕໍ່ປະຊາຊົນລາວ ແລະ ໄດ້ສະໜອງວັກຊິນຊິໂນຟາມ ໃຫ້ແກ່ປະເທດເຮົາທັງໝົດເກືອບ 2 ລ້ານໂດສ ເຊິ່ງກວມເອົາ 90% ຂອງວັກຊິນທີ່ມີໃນ ສປປ ລາວ.

     ມາຮອດປັດຈຸບັນ ອົງການອະນາໄມໂລກໄດ້ຮັບຮອງໃຫ້ວັກຊິນຊິໂນຟາມ ສາມາດໃຊ້ໄດ້ກັບຜູ້ສູງອາຍຸ ແລະ ຜູ້ມີພະຍາດຊໍ້າເຮື້ອ ສະນັ້ນ ຈຶ່ງຢາກຊີ້ແຈງໃຫ້ພໍ່ແມ່ປະຊົນເຂົ້າໃຈ ບໍ່ຢາກກັງວົນ ລັງເລໃຈ ເມື່ອມີວັກຊິນເຂົ້າມາແລ້ວ ແມ່ນຈະໄດ້ພູມຄຸ້ມກັນ ແລະ ຕ້ານທານຕໍ່ພະຍາດໂຄວິດ-19 ເຊັ່ນດຽວກັນ.

     ທ່ານ ດຣ ພອນປະເສີດ ອຸນາພົມ ແຈ້ງໃຫ້ຮູ້ຕື່ມວ່າ: ສໍາລັບຢູ່ນະຄອນຫຼວງວຽງຈັນ ການສັກວັກຊິນຊິໂນຟາມ ແລະ ໄຟເຊີເຂັມທີ 1 ໄດ້ສັກຄົບກຳນົດໂກຕາທີ່ ນວ ໄດ້ຮັບແລ້ວ ສະນັ້ນ ຈຶ່ງໄດ້ໂຈະການສັກເຂັມທີ 1  ແຕ່ຍັງຈະສືບຕໍ່ສັກເຂັມທີ 2 ຊີໂນຟາມ ແຕ່ວັນທີ 21-28 ມິຖຸນາ 2021 ຮຽກຮ້ອງໃຫ້ຜູ້ມີກໍານົດສັກເຂັມທີ 2 ຈົ່ງເຂົ້າໄປໃຊ້ບໍລິການຮັບວັກຊີນຊີໂນຟາມໃຫ້ຄົບ 21-28 ວັນ ສ່ວນເຂັມທີ 2 ແອັສຕຣາເຊເນກາ ຫາກທ່ານໃດສັກເຂັມທີ 1 ໄດ້ຄົບ 8-12 ອາທິດ ກໍສາມາດເຂົ້າໄປຮັບວັກຊີນໄດ້ຕາມຈຸດບໍລິການຕ່າງໆໄດ້ປົກກະຕິຕາມທີ່ຄະນະສະເພາະກິດກຳນົດໄວ້.

     ໂອກາດນີ້ ຂໍແຈ້ງຕື່ມອີກວ່າ ສຳລັບເດືອນກໍລະກົດທີ່ຈະມາເຖິງນີ້ ສປປ ລາວ ເຮົາຍັງຈະໄດ້ຮັບການຊ່ວຍເຫຼືອວັກຊິນແອັສຕາເຊເນກາ ແລະ ຈອນສັນແອນຈອນສັນຈາກສາກົນຕື່ມອີກ ເພື່ອມາສັກໃຫ້ປະຊາຊົນລາວທີ່ບໍ່ທັນໄດ້ສັກໃຫ້ໄດ້ຢ່າງທົ່ວເຖິງ.

   # ຂ່າວ & ພາບ:  ລັດເວລາ

The post ເດືອນກໍລະກົດນີ້ ລາວຈະຮັບການຊ່ວຍເຫຼືອວັກຊີນຈອນສັນແອນຈອນສັນ ແລະ ແອັສຕຣາເຊເນກາ appeared first on Vientiane Mai.

    ພິທີເຊັນສັນຍາລະຫວ່າງປະເທດອົດສະຕຣາລີ ເຢຍລະມັນ ແລະ ສະວິດ ເພື່ອໃຫ້ການຊ່ວຍເຫຼືອມູນຄ່າເກືອບ 13 ລ້ານໂດລາສະຫະລັດ ໃຫ້ຄະນະກໍາມະທິການແມ່ນໍ້າຂອງສາກົນ (ຄມສ) ເພື່ອປັບປຸງສະພາບການລວມຂອງອ່າງແມ່ນ້ໍາຂອງ ເພື່ອຊ່ວຍປະເທດກໍາປູເຈຍ ສປປ ລາວ ປະເທດໄທ ແລະ ປະເທດຫວຽດນາມ ຕອບໂຕ້ກັບບັນຫາທ້າທາຍ ພ້ອມທັງປົກປ້ອງລະບົບນິເວດຂອງແມ່ນໍ້າຂອງ ແລະ ປັບປຸງຊີວິດການເປັນຢູ່ຂອງປະຊາຊົນ ຈັດຂຶ້ນວັນທີ 24 ມິຖຸນາ 2021 ທີ່ສໍານັກງານ ຄມສ ນະຄອນຫຼວງວຽງຈັນ ຮ່ວມລົງນາມມອບ-ຮັບມີ ທ່ານ ພໍ ເຄວລີ ເອກອັກຄະລັດຖະທູດອົດສະຕຣາລີ ປະຈໍາ ສປປ ລາວ ທ່ານ ເຈັນ ລຸດເກນເຮີມ ເອກອັກຄະລັດຖະທູດເຢຍລະມັນ ປະຈໍາ ສປປ ລາວ ທ່ານ ຊ໋ອງຟຣອງຊົວ ກູເອໂນ ຫົວໜ້າອົງການເພື່ອການພັດທະນາ ແລະ ການຮ່ວມມືປະເທດສະວິດ ປະຈໍາພາກພື້ນ ແລະ ທ່ານ ດຣ ອັນ ພິສ ຮັນດາ ຫົວໜ້າກອງເລຂາ ຄມສ ມີພະນັກງານວິຊາການທີ່ກ່ຽວຂ້ອງເຂົ້າຮ່ວມ.

• 
• 

    ສັນຍາໃຫ້ທຶນຄັ້ງນີ້ ປະເທດອົດສະຕຣາລີ ຊ່ວຍເຫຼືອມູນຄ່າ 5,1 ລ້ານໂດລາອົດສະຕຣາລີ (ປະມານ 3,8 ລ້ານໂດລາ ສະຫະລັດ) ສະໜັບສະໜູນໃໝ່ ໄລຍະ 5 ປີ ແຕ່ປີ 2021 ເຖິງປີ 2025 ປະເທດເຢຍລະມັນ 3 ລ້ານຢູໂຣ (ປະມານ 3,55 ລ້ານໂດລາສະຫະລັດ) ໃນໄລຍະ 3 ປີ ເລີ່ມຈາກປີ 2022 ເຊິ່ງ ໃນນັ້ນ 1,2 ລ້ານໂດລາສະຫະລັດ ແມ່ນຈັດສັນໃຫ້ກົນໄກສະໜອງທຶນ ຂອງ ຄມສ ແລະ ສ່ວນທີ່ເຫຼືອ ແມ່ນໄດ້ຈັດສັນໃຫ້ແຜນງານຮ່ວມມື ຄມສ-ຈີໄອແຊັດ ສໍາລັບການຊ່ວຍເຫຼືອທາງດ້ານວິຊາການ ແລະ ອົງການເພື່ອການພັດທະນາ ແລະ ການຮ່ວມມືປະເທດສະວິດ ປະຈໍາພາກພື້ນ ສະໜັບສະໜູນການຈັດຕັ້ງປະຕິບັດແຜນຍຸດທະສາດ ຄມສ ສະບັບໃໝ່ ມູນຄ່າ 5,3 ລ້ານໂດລາສະຫະລັດ ໄລຍະເວລາ 5 ປີ.

   # ຂ່າວ & ພາບ: ວຽງມາ

The post ປະເທດຄູ່ຮ່ວມພັດທະນາ ສະໜອງທຶນເກືອບ 13 ລ້ານໂດລາ ເພື່ອປັບປຸງສະພາບການລວມຂອງອ່າງແມ່ນ້ໍາຂອງ appeared first on Vientiane Mai.

    ວັນທີ 25 ມິຖຸນາ 2021 ຢູ່ອົງການກາແດງລາວ ບໍລິສັດ ພຣູເດັນໂຊລ ປະກັນໄພຊີວິດ (ລາວ) ຈຳກັດ ໄດ້ນຳເຂົ້າສານຈຳນວນ 1,5 ໂຕນ ປ໋ອງປາ 480 ປ໋ອງ ນໍ້າດື່ມ 120 ແກັດ ແລະ ຢາກັນຍຸງ 300 ກ່ອງ ລວມມູນຄ່າ 30 ລ້ານກີບ ມາມອບໃຫ້ອົງການກາແດງລາວ ເພື່ອປະກອບສ່ວນຊ່ວຍເຫຼືອປະຊາຊົນທີ່ປະສົບໄພນໍ້າຖ້ວມຈາກພະຍຸໂຄກະມະ ຢູ່ແຂວງໄຊຍະບູລີ ໃນໄລຍະທີ່ຜ່ານມາ ເປັນກຽດກ່າວມອບເຄື່ອງຈຳນວນດັ່ງກ່າວນີ້ ໂດຍທ່ານ ວິເຈ ມັດດາວັນ ຜູ້ອຳນວຍການໃຫຍ່ບໍລິສັດ ພຣູເດັນໂຊລ ປະກັນໄພຊີວິດ(ລາວ) ຈຳກັດ ແລະ ກ່າວຮັບໂດຍທ່ານ ພູທອນ ເມືອງປາກ ປະທານອົງການກາແດງລາວ.

    ໂອກາດນີ້ ທ່ານປະທານອົງການກາແດງລາວ ກໍໄດ້ສະແດງຄວາມຊົມເຊີຍ ແລະ ຄວາມຂອບໃຈຕໍ່ທ່ານ ວິເຈ ມັດດາວັນ ຜູ້ອຳນວຍການໃຫຍ່ບໍລິສັດ ພຣູເດັນໂຊລ ທີ່ນຳເຄື່ອງຊ່ວຍເຫຼືອມາມອບໃຫ້ແກ່ປະຊາຊົນທີ່ຖືກປະສົບໄພນໍ້າຖ້ວມຄັ້ງນີ້ ເຊິ່ງເປັນການປະກອບສ່ວນຊ່ວຍເຫຼືອສັງຄົມ ກໍຄືປະຊາຊົນທີ່ຖືກຜົນກະທົບຈາກໄພນໍ້າຖ້ວມໃນກາງເດືອນທີ່ຜ່ານມາ ພ້ອມທັງສັນຍາວ່າຈະນຳເຄື່ອງຊ່ວຍເຫຼືອທັງໝົດນີ້ ໄປມອບໃຫ້ປະຊາຊົນຜູ້ທີ່ຖືກຜົນກະທົບຢ່າງທົ່ວເຖິງ.

    ໃນວັນດຽວກັນນີ້ ມູນນິທິຮ່ວມໃຈພັດທະນາລາວ ກໍໄດ້ນຳເຂົ້າສານຈຳນວນ 1 ໂຕນ ແລະ ນ້ຳດື່ມ 237 ແກັດ ມູນຄ່າ 10 ລ້ານກີບ ມາມອບໃຫ້ອົງການກາແດງລາວເຊັ່ນດຽວກັນ ເປັນກຽດກ່າວມອບໂດຍທ່ານ ພູວົງ ພະມີສິດ ປະທານມູນນິທິຮ່ວມໃຈພັດທະນາລາວ ແລະ ກ່າວຮັບຂອງທ່ານ ພູທອນ ເມືອງປາກ ປະທານອົງການກາແດງລາວ.

   # ຂ່າວ & ພາບ: ຊິລິການດາ

The post ພຣູເດັນໂຊລ ແລະ ມູນນິທິຮ່ວມໃຈພັດທະນາ ມອບເຄື່ອງຊ່ວຍເຫຼືອໄພນ້ຳຖ້ວມ appeared first on Vientiane Mai.

         ສະມາຄົມນັກຂ່າວແຫ່ງ ສປປ ລາວ (ສຂລ) ແລະ ວິທະຍຸສາກົນແຫ່ງປະເທດຈີນ ປະຈໍາ ສປປ ລາວ (Cri) ໄດ້ຈັດພົບປະປຶກສາຫາລືວຽກງານກ່ຽວການສ້າງກິດຈະກໍາໃນວັນສື່ມວນຊົນ ແລະ ພິມຈໍາໜ່າຍ ຄົບຮອບ 71 ປີ (13/8/1950-13/8/2021) ຂຶ້ນວັນທີ 24 ມິຖຸນາ 2021 ທີ່ສໍານັກຂ່າວ Cri ນະຄອນຫຼວງວຽງຈັນ ມີທ່ານ ສະຫວັນຄອນ ຣາຊມຸນຕີ ອະດີດຮອງລັດຖະມົນຕີກະຊວງຖະແຫຼງຂ່າວ ວັດທະນາທໍາ ແລະ ທ່ອງທ່ຽວ ປະທານ ສຂລ ທ່ານນາງ ແສງແກ້ວ (Mo Xiaoling) ຫົວໜ້າວິທະຍຸສາກົນແຫ່ງປະເທດຈີນ ປະຈໍາລາວ ບັນດາຫົວໜ້າ ຮອງກົມຈາກກະຊວງຖະແຫຼງຂ່າວ ວັດທະນາທໍາ ແລະ ທ່ອງທ່ຽວ ຮອງປະທານ ເລຂາທິການ ຄະນະບໍລິຫານງານ ສຂລ ແລະ ພະນັກງານ Cri ເຂົ້າຮ່ວມ.

   ການພົບປະຄັ້ງນີ້ ໄດ້ປຶກສາຫາລືວຽກງານຕ່າງໆທີ່ຕິດພັນກັບກິດຈະກໍາ ເພື່ອສ້າງຂະບວນການອຸທິດແດ່ວັນສື່ມວນຊົນ ແລະ ພິມຈໍາໜ່າຍ ຄົບຮອບ 71 ປີ ໃຫ້ມີບັນຍາກາດຟົດຟື້ນ ພ້ອມນັ້ນ ຍັງເປັນວັນສ້າງຕັ້ງ Cri ພາສາລາວ ຄົບຮອບ 65 ປີ ແລະ ວັນເປີດສໍານັກງານ Cri ຢູ່ລາວ ຄົບຮອບ 10 ປີ ເພື່ອເຮັດໃຫ້ວັນດັ່ງກ່າວເຕັມໄປດ້ວຍຄວາມໝາຍສໍາຄັນໃນດ້ານວິຊາການ ​ເຊິ່ງ 2 ຝ່າຍຈຶ່ງໄດ້ພົບປະສົນທະນາກ່ຽວກັບການພັດທະນາສື່ມວນຊົນແບບໃໝ່ໃນໄລຍະໃໝ່ ໂດຍຈະຮ່ວມກັນຈັດຕັ້ງເວທີປຶກສາຫາລືໃນຫົວຂໍ້ຕ່າງໆ ໂດຍຈະເນັ້ນການຫັນເປັນທັນສະໄໝໃນການຜະລິດຂ່າວ ການນໍາໃຊ້ສື່ສິ່ງພິມ ສື່ເອເລັກໂຕຣນິກທີ່ທັນສະໄໝ ລວມທັງການນໍາໃຊ້ສື່ອອນລາຍໃຫ້ເປັນປະໂຫຍດແກ່ສັງຄົມ ທັງນີ້ເພື່ອຈໍາກັດ ຄວບຄຸມ ແລະ ຫຼີກລ່ຽງການສ້າງຂ່າວລື-ຂ່າວປອມທີ່ບິດເບືອນ ອັນເຮັດໃຫ້ສັງຄົມມີຄວາມບໍ່ສະຫງົບ ຈາກນັ້ນ 2 ພາກສ່ວນຍັງໄດ້ລາຍງານຜົນການພົບປະກັນຄັ້ງນີ້ໃຫ້ການນໍາຂອງຝ່າຍຕົນພິຈາລະນາໃນຂັ້ນຕໍ່ໄປ ແລະ ຄາດວ່າ ການສໍາມະນາຈະຈັດຂຶ້ນເດືອນສິງຫາ 2021.

    ໂອກາດນີ້ ທ່ານ ສະຫວັນຄອນ ຣາຊມຸນຕີ ໄດ້ແນະນໍາ ແລະ ມອບໝາຍໃຫ້ທີ່ປະຊຸມນໍາເອົາຈິດໃຈເນື້ອໃນຜົນກອງປະຊຸມໄປຈັດຕັ້ງປະຕິບັດ ໂດຍສ້າງຮ່າງດໍາເນີນວຽກງານ ແລ້ວຜ່ານຄະນະນໍາ ສຂລ ແລະ Cri ເພື່ອຂໍທິດຊີ້ນໍາຈາກຄະນະນໍາກະຊວງຖະແຫຼງຂ່າວ ວັດທະນາທໍາ ແລະ ທ່ອງທ່ຽວ ຈາກນັ້ນ 2 ພາກສ່ວນຈະນໍາໄປຈັດຕັ້ງປະຕິບັດໃຫ້ປາກົດຜົນເປັນຈິງ ໂດຍສະເພາະ ໃຫ້ສັງຄົມເຫັນໄດ້ມູນເຊື້ອອັນສະຫງ່າງາມຂອງສື່ມວນຊົນ ແລະ ພິມຈໍາໜ່າຍຂອງລາວ ໃນຕະຫຼອດໄລຍະ 71 ປີ ແຫ່ງການກໍາເນີດ ແລະ ເຕີບໃຫຍ່ພາຍໃຕ້ການນໍາຂອງພັກ ​ເຊິ່ງໄດ້ປະຈັນບານໃນທຸກສະໜາມຮົບ ກາຍເປັນນັກຮົບແນວຄິດ ແລະ ວັດທະນາທໍາ ພ້ອມນັ້ນ ຍັງໄດ້ຮ່ວມມືກັບສະມາຄົມນັກຂ່າວບັນດາປະເທດເພື່ອນມິດອ້າຍນ້ອງ ລວມທັງການຮ່ວມມືກັບ Cri ໃນການພັດທະນາສື່ມວນຊົນລາວໃຫ້ກ້າວທັນຍຸກສະໄໝ ບົນແນວທາງນະໂຍບາຍຂອງພັກ ແລະ ລັດຖະບານໃນຍຸກປ່ຽນແປງໃໝ່ ໂດຍສະເພາະໃນໄລຍະທີ່ມີການລະບາດຂອງພະຍາດໂຄວິດ.

# ຂ່າວ & ພາບ: ສົມສະຫວັນ

The post ສະມາຄົມນັກຂ່າວ ແລະ Cri ຫາລືສ້າງກິດຈະກຳວັນສື່ appeared first on Vientiane Mai.

    ໂດຍໄດ້ຮັບການສະໜັບສະໜູນຈາກໂຄງການພັດທະນາກະສິກໍາສະອາດ (CADP) ຂະແໜງປູກຝັງ ພະແນກກະສິກໍາ ແລະ ປ່າໄມ້ ນະຄອນຫຼວງວຽງຈັນ (ນວ) ໄດ້ຈັດເຝິກອົບຮົມການວາງແຜນການຜະລິດ ແລະ ຄິດໄລ່ຕົ້ນທຶນການຜະລິດພືດຜັກອິນຊີ ໃຫ້ກຸ່ມກະສິກໍາອິນຊີ ນວ ວັນທີ 24 ມິຖຸນາ 2021 ທີ່ພະແນກດັ່ງກ່າວ ເປັນປະທານຮ່ວມຂອງທ່ານ ວາດສະໜາ ສີຈະເລີນ ຮອງຫົວໜ້າພະແນກກະສິກໍາ ແລະ ປ່າໄມ້ ນວ ທ່ານ ຮິໂຮຢູກິ ຊາກູມະ ຫົວໜ້າຄະນະຊຽວຊານໂຄງການພັດທະນາກະສິກໍາສະອາດ ມີຄູ່ຮ່ວມງານຈັດຕັ້ງປະຕິບັດໂຄງການຈາກສູນມາດຕະຖານກະສິກໍາສະອາດ ຂະແໜງປູກຝັງ ພະແນກກະສິກໍາ ແລະ ປ່າໄມ້ ນວ ໜ່ວຍງານປູກຝັງເມືອງ ກຸ່ມກະສິກໍາອິນຊີ ນວ ແລະ ກຸ່ມກະສິກໍາອິນຊີແຕ່ລະບ້ານອ້ອມຂ້າງ ນວ ເຂົ້າຮ່ວມ.

    ທ່ານ ວາດສະໜາ ສີຈະເລີນພັນ ກ່າວວ່າ: ວຽກງານກະສິກໍາອິນຊີ ກໍຄືວຽກງານກະສິກໍາສະອາດ ເປັນວຽກງານໜຶ່ງທີ່ມີຄວາມສໍາຄັນ ແລະ ຈໍາເປັນ ເປັນວຽກງານທີ່ພັກ-ລັດຖະບານ ໂດຍສະເພາະ ກະຊວງກະສິກໍາ ແລະ ປ່າໄມ້ ໄດ້ມີແຜນນະໂຍບາຍໃຫ້ຊຸກຍູ້ຂະຫຍາຍກໍາລັງການຜະລິດໃຫ້ກວ້າງຂວາງໃນຂອບເຂດທົ່ວປະເທດ ເວົ້າສະເພາະໃນນະຄອນຫຼວງວຽງຈັນ ປັດຈຸບັນ ເຫັນວ່າກຸ່ມຜະລິດກະສິກໍາອິນຊີ ນວ ມີຈໍານວນທັງໝົດ 11 ກຸ່ມ ມີສະມາຊິກ 300 ຄອບຄົວ ມີເນື້ອທີ່ການຜະລິດ 291 ເຮັກຕາ ຜົນຜະລິດ 2.624 ໂຕນ ກວມເອົາ 6 ເມືອງໃນ ນວ ເຊິ່ງປີ 2021 ມີຜົນຜະລິດເຂົ້າມາຈໍາໜ່າຍທັງໝົດ 790 ໂຕນ ມູນຄ່າ 12,6 ຕື້ກີບ ແຕ່ລະຄອບຄົວມີລາຍຮັບສະເລ່ຍ 3.500.000 ຫາ 5.000.000 ກີບຕໍ່ເດືອນ.

    ຕໍ່ສະພາບການດັ່ງກ່າວ ເມື່ອທຽບໃສ່ໄລຍະຜ່ານມາ ເຫັນວ່າກຸ່ມກະສິກໍາອິນຊີມີການພັດທະນາ ແລະ ຂະຫຍາຍຂຶ້ນ ເຊິ່ງສ້າງເຮືອນຮົ່ມປູກຜັກລະດູຝົນໃນປີ 2020 ມີທັງໝົດ 801 ຫຼັງ ພ້ອມນັ້ນ ລັດຖະບານໄດ້ເປີດໃຫ້ເຂົ້າຫາແຫຼ່ງທຶນໄດ້ຫຼາຍຊ່ອງທາງ ເຊັ່ນ: ທະນາຄານຈຸລະພາກ SME ທະນາຄານສົ່ງເສີມກະສິກໍາ ທະນາຄານນະໂຍບາຍ ພົ້ນເດັ່ນໃນປີ 2021 ຄະນະສະເພາະກິດສົ່ງເສີມການລົງທຶນ ແລະ ການຜະລິດເປັນສິນຄ້າ ໄດ້ໃຫ້ທຶນສໍາລັບກຸ່ມຈໍານວນ 2,1 ຕື້ກີບ ເພື່ອຊຸກຍູ້ການຜະລິດພືດຜັກອິນຊີເປັນສິນຄ້າ ຕອບສະໜອງການບໍລິໂພກພາຍໃນ ນອກນັ້ນ ທາງໂຄງການພັດທະນາກະສິກໍາສະອາດຍັງໄດ້ສະໜອງເຮືອນຮົ່ມຕົວແບບ 5 ຫຼັງ.

​                              # ຂ່າວ & ພາບ:  ຂັນທະວີ

The post ກຸ່ມຜະລິດກະສິກໍາອິນຊີ ມີຜົນຜະລິດເຂົ້າຈໍາໜ່າຍຕະຫຼາດ 790 ໂຕນ appeared first on Vientiane Mai.

    ທ່ານ ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່ ຕາງໜ້າກອງເລຂາຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ຖະແຫຼງຂ່າວມື້ນີ້ ກ່ຽວກັບສະພາບໂຄວິດ-19 ໃນ ສປປ ລາວ ວ່າ: ສຳລັບ ສປປ ລາວ ມາຮອດວັນທີ 24 ມິຖຸນາ 2021 ໄດ້ກວດວິເຄາະທັງໝົດ 1.159 ຄົນ ໃນນັ້ນ ກວດພົບຜູ້ຕິດເຊື້ອທັງໝົດ 14 ຄົນ ຈາກນະຄອນຫຼວງ 3 ຄົນ ສະຫວັນນະເຂດ 3 ຄົນ ແລະ ຈຳປາສັກ 8 ຄົນ ເຊິ່ງທັງໝົດແມ່ນເປັນກໍລະນີນຳເຂົ້າ ສ່ວນແຂວງສະຫວັນນະເຂດ 3 ຄົນ ແລະ ແຂວງຈຳປາສັກ 8 ຄົນ ແມ່ນກວດພົບຈາກແຮງງານລາວທີ່ກັບມາຈາກປະເທດເພື່ອນບ້ານ ໂດຍຖືກຕ້ອງຕາມກົດໝາຍ ສ່ວນນະຄອນຫຼວງວຽງຈັນ 3 ຄົນ ແມ່ນເປັນກໍລະນີນຳເຂົ້າຈາກຕ່າງປະເທດ ສໍາລັບລາຍລະອຽດກ່ຽວກັບ 3 ຄົນທີ່ຕິດເຊື້ອໃໝ່ ໃນນະຄອນຫຼວງວຽງຈັນ ຄື:

• ຄົນທີທໍາອິດ ເພດຍິງ ອາຍຸ 35 ປີ ສັນຊາດໂຄລຳບີ ອາຊີບ ພະນັກງານບໍລິສັດ ຜູ້ກ່ຽວມີອາການໄອ ເຈັບຫົວ ເມື່ອຍ ແລະ ປວດຕາມຕົນໂຕ ເດີນທາງມາຈາກປະເທດການາດາ ຜ່ານສະໜາມບິນກົວລາລຳເປີ ປະເທດມາເລເຊຍ ມາສະໜາມບິນສາກົນວັດໄຕ ສປປ ລາວ ດ້ວຍຖ້ຽວບິນ AK7552 KUL-VTE (ນັ່ງຕັ່ງນໍ້າເບີ 21B) ໃນວັນທີ 24 ມິຖຸນາ 2021 ຖືກເກັບຕົວຢ່າງ ຢູ່ສະໜາມບິນສາກົນວັດໄຕ ແລະ ຜົນກວດພົບເຊື້ອ.
• ຄົນທີສອງ ເພດຊາຍ ອາຍຸ 28 ປີ ສັນຊາດລາວ ຮຽນຈົບຈາກ ສ ຣັດເຊຍ ຜູ້ກ່ຽວບໍ່ມີອາການຫຍັງ ເດີນທາງມາຈາກ ສ ຣັດເຊຍ ຜ່ານສະໜາມບິນກົວລາລຳເປີ ປະເທດມາເລເຊຍ ມາສະໜາມບິນສາກົນວັດໄຕ ສປປ ລາວ ດ້ວຍຖ້ຽວບິນ AK7552 KUL-VTE (ນັ່ງຕັ່ງນໍ້າເບີ 9A)  ໃນວັນທີ 24  ມິຖຸນາ 2021 ຖືກເກັບຕົວຢ່າງຢູ່ສະໜາມບິນສາກົນວັດໄຕ ແລະ ຜົນກວດພົບເຊື້ອ.
• ຄົນທີ 3 ເພດຊາຍ ອາຍຸ 28 ປີ ສັນຊາດລາວ ຮຽນຈົບຈາກ ສ ຣັດເຊຍ ຜູ້ກ່ຽວບໍ່ມີອາການຫຍັງ ເດີນທາງມາຈາກ ສ ຣັດເຊຍ ຜ່ານສະໜາມບິນກົວລາລຳເປີ ປະເທດມາເລເຊຍ ມາສະໜາມບິນສາກົນວັດໄຕ ສປປ ລາວ ດ້ວຍຖ້ຽວບິນ AK7552 KUL-VTE (ນັ່ງຕັ່ງນໍ້າເບີ 43J) ໃນວັນທີ 24 ມິຖຸນາ 2021 ຖືກເກັບຕົວຢ່າງ ຢູ່ສະໜາມບິນສາກົນວັດໄຕ ແລະ ຜົນກວດພົບເຊື້ອ ປັດຈຸບັນມີຜູ້ປີ່ນປົວຫາຍດີທັງໝົດ 1.968 ຄົນ ແລະ ຍັງສືບຕໍ່ປິ່ນປົວ 123 ຄົນ.

    ປັດຈຸບັນ ຈຳນວນບ້ານແດງໃນນະຄອນຫຼວງວຽງຈັນ ແມ່ນມີທັງໝົດ 13 ບ້ານ ໃນ 4 ເມືອງ ບ້ານໃໝ່ທີ່ຖືກກຳນົດເປັນເຂດແດງ ມີ 1 ບ້ານ ຄື: ບ້ານນາສ້າງໄພ ເມືອງໄຊເສດຖາ.

   # ຂ່າວ & ພາບ: ສີພອນ

The post ກວດພົບຜູ້ຕິດເຊື້ອໂຄວິດ-19 ໃໝ່ 14 ຄົນ ທັງໝົດແມ່ນກໍລະນີນໍາເຂົ້າ appeared first on Vientiane Mai.

    ກະຊວງສຶກສາທິການ ແລະ ກີລາ ແລະ ລັດຖະບານອົດສະຕຣາລີ ກຳລັງເຜີຍແຜ່ກ່ຽວກັບວິທີການສອນສຽງເພື່ອຮຽນພາສາອັງກິດເປັນວິດີໂອສຳລັບການພັດທະນາຄູ ເພື່ອແນະນຳວິທີການສອນສຽງພາສາອັງກິດ ເຊິ່ງຜະລິດໂດຍກະຊວງສຶກສາທິການ ແລະ ກີລາ ແລະ ໄດ້ຮັບການສະໜັບສະໜູນຈາກລັດຖະບານອົດສະຕຣາລີ.

    ໃນຫຼັກສູດຊັ້ນປະຖົມສຶກສາ ວິຊາພາສາອັງກິດ ສະບັບປັບປຸງໃໝ່ ແມ່ນໄດ້ຖືກພັດທະນາໂດຍກະຊວງສຶກສາທິການ ແລະ ກີລາ (ສສກ) ໂດຍການສະໜັບສະໜູນຈາກລັດຖະບານອົດສະຕຣາລີ ຜ່ານແຜນງານບີຄວາ  ເຊິ່ງການສອນສຽງ  ແມ່ນໄດ້ສອນແຕ່ຂັ້ນ ປ3 ຫາ ຂັ້ນ ປ5 ເພື່ອຊ່ວຍໃຫ້ນັກຮຽນໄດ້ພັດທະນາທັກສະການອ່ານ ແລະ ການຂຽນຂອງພວກເຂົາ.

    ການສອນສຽງ ຈະຊ່ວຍໃຫ້ນັກຮຽນເຂົ້າໃຈກ່ຽວກັບວິທີການອອກສຽງຕົວອັກສອນ ແລະ ການສະກົດຄຳຕ່າງໆໃນພາສາອັງກິດ ຂັ້ນຕອນການຮຽນ ການອ່ານຂັ້ນເລີ່ມຕົ້ນນີ້ ການສອນສຽງສາມາດຊ່ວຍໃຫ້ນັກຮຽນໄດ້ມີການພັດທະນາໄວຂຶ້ນ ນອກຈາກນີ້ ວິທີການສອນສຽງ ຍັງໄດ້ແນະນຳການສອນສຽງວິຊາພາສາລາວໃນສື່ອຸປະກອນຂອງຫຼັກສູດຊັ້ນປະຖົມສຶກສາສະບັບປັບປຸງໃໝ່ນີ້ອີກດ້ວຍ.

    ເຖິງຈະມີສິ່ງທ້າທາຍໃນໄລຍະການຮັກສາມາດຕະການປ້ອງກັນການແຜ່ລະບາດຂອງພະຍາດໂຄວິດ -19 ແລະ ອີງໃສ່ແນວຄວາມຄິດສ້າງສັນຂອງຊັບພະຍາກອນຂອງທີມງານຈາກສູນພັດທະນາສື່ການຮຽນການສອນທາງເອເລັກໂຕຣນິກ ສະຖາບັນຄົ້ນຄວ້າວິທະຍາສາດການສຶກສາ ສວສ ກະຊວງ ສສກ ສືບຕໍ່ການເຮັດວຽກຢູ່ເຮືອນ  ເພື່ອຜະລິດວິດີໂອສຳລັບການພັດທະນາຄູຊຸດໃໝ່ຈົນສຳເລັດພາຍໃນ 1 ອາທິດ.

    ວິດີໂອສຳລັບການຝຶກອົບຮົມຄູຊຸດໃໝ່ນີ້ ໄດ້ສາທິດການສະແດງເຕັກນິກຕ່າງໆທີ່ສຳຄັນກ່ຽວກັບການສອນສຽງ ລວມທັງວິທີການສອນສຽງໃໝ່ ວິທີການສອນການສະກົດຄຳຕ່າງໆ ເພື່ອຊ່ວຍໃຫ້ນັກຮຽນເຂົ້າໃຈກ່ຽວກັບຕົວອັກສອນ ແລະ ສຽງຕ່າງໆແລ້ວ ພວກເຂົາຈະສາມາດນໍາໃຊ້ຄວາມຮູ້ ແລະ ທັກສະນີ້ ເພື່ອປະສົມສຽງ ແລະ ອ່ານເປັນຄຳສັບງ່າຍໆທີ່ເອີ້ນວ່າ ການປະສົມສຽງ.

    ທ່ານສາມາດເຂົ້າເບີ່ງວິດີໂອຊຸດໃໝ່ນີ້ ແລະ ວິດີໂອອື່ນໆໂດຍຜ່ານຊ່ອງຍູທູບ: ວິດີໂອສໍາລັບການພັດທະນາຄູ Teacher Development Videos ວິດີໂອຊຸດໃໝ່ທຸກອັນ ແມ່ນໄດ້ມີພາສາມືເພີ່ມເຂົ້າໃນວິດີໂອ ເພື່ອຊ່ວຍໃຫ້ທຸກຄົນສາມາດເຂົ້າເຖິງວິດີໂອເຫຼ່ົານີ້ໄດ້ຫຼາຍຂຶ້ນ ເພື່ອຊ່ວຍໃຫ້ຄູໄດ້ພັດທະນາທັກສະຂອງພວກເຂົາໃນການນຳໃຊ້ຫຼັກສູດຊັ້ນປະຖົມສຶກສາແຫ່ງຊາດ ສະບັບປັບປຸງໃໝ່ ແລະ ວິທີການຮຽນການສອນແບບໃໝ່ ທີ່ເນັ້ນໃຫ້ນັກຮຽນໄດ້ປະຕິບັດຕົວຈິງ.

# ຂ່າວ – ພາບ: ບຸນມີ ສີວິໄລ

The post ເຜີຍແຜ່ວິດີໂອ 16 ການແນະນຳການສອນສຽງ ສຳລັບການພັດທະນາຄູ appeared first on Vientiane Mai.

    ໂຮງຮຽນມັດທະຍົມສຶກສາສົມບູນວຽງຈັນ ເຂົ້າຮ່ວມກິດຈະກຳກັບມູນນິທິລາງວັນເຈົ້າຟ້າມະຫາຈັກກຣີ ຮ່ວມກັບ 11 ປະເທດອາຊຽນ ຍ້ອນວ່າທ່ານ ນາງ ຄໍາຊ້ອຍ ວົງສໍາພັນ ອະດີດຄະນະອໍານວຍການໂຮງຮຽນ ມສ ວຽງຈັນ ໄດ້ຮັບລາງວັນດັ່ງກ່າວເປັນຄົນທຳອິດໃນປີ 2015 ແລະ ໃນປີຜ່ານມາ ກິດຈະກຳ Fabulous Asean Breakfast (FAB) ເຊິ່ງມີນັກຮຽນ ມສ ວຽງຈັນເຂົ້າຮ່ວມ 2 ຄົນ.

    ປັດຈຸບັນ ແມ່ນໂຄງການ ASIAN SCHOOL COLLABORATION ຄັ້ງນີ້ ນັກຮຽນໄດ້ເລືອກຫົວຂໍ້ Asian Traditional Costumes ເຊິ່ງນັກຮຽນ ມສ ວຽງຈັນ ຈຳນວນ 20 ຄົນ ໄດ້ຮ່ວມ ເຊິ່ງໄດ້ເຮັດວຽກເປັນທີມກັບທີມປະເທດກຳປູເຈຍ ໂດຍແບ່ງນັກຮຽນລາວ 2 ຄົນ ກັບນັກຮຽນກຳບູເຈຍ 2 ຄົນ ເຊິ່ງນັກຮຽນຈະໄດ້ພັດທະນາທັກສະຂອງຕົນ ໄດ້ຮຽນຮູ້ການເຮັດວຽກເປັນທີມ ເຝິກທັກສະການໃຊ້ພາສາອັງກິດ ແລະ ມີຫົວຄິດສ້າງສັນໃນການເຮັດປົດສະເຕີ ແລະ ວິດີໂອ.

    ຈາກການເຄື່ອນໄຫວກິດຈະກຳຄັ້ງນີ້ ນັກຮຽນຍິງ 2 ຄົນ ໄດ້ຮັບລາງວັນປົດສະເຕີດີເດັ່ນ ຄື: ນາງ ຕິ່ງກີ້ ປ້ອງວຽງທອງ ແລະ ນາງ ປູຣິດາ ໄຊຍະສອນ ນັກຮຽນຊັ້ນ ມ5 ຂອງໂຮງຮຽນ ມສ ວຽງຈັນ ແລະ ໃນວັນທີ 19 ມິຖຸນາ 2021 ຜ່ານມາ ທ່ານນາງ ຄຳຊ້ອຍ  ວົງສຳພັນ ອະດີດຄະນະອຳນວຍການໂຮງຮຽນ ຍັງໄດ້ເຂົ້າຮ່ວມການເສວະນາຮ່ວມກັບປະເທດໄທ ແລະ ປະເທດ ສສ ຫວຽດນາມ ກ່ຽວກັບການທ້າທາຍໃນການຈັດຕັ້ງການຮຽນ-ການສອນໃນຍຸກໂຄວິດ-19 ໃນແຕ່ລະປະເທດ.

• 
• 

# ຂ່າວ – ພາບ: ບຸນມີ ສີວິໄລ

The post ນັກຮຽນຍິງ ມສ ວຽງຈັນ 2 ຄົນ ໄດ້ຮັບລາງວັນປົດສະເຕີດີເດັ່ນ appeared first on Vientiane Mai.

    ກະຊວງແຜນການ-ການລົງທຶນ ແລະ ທະນາຄານພັດທະນາອາຊີ (ADB) ຮ່ວມກັບກະຊວງການເງິນ ໄດ້ເປີດກອງປະຊຸມທາງອອນລາຍ ກ່ຽວກັບວຽກງານການຈັດຊື້-ຈັດຈ້າງ ຂຶ້ນວັນທີ  22 ມິຖຸນາ 2021 ເພື່ອສ້າງຄວາມສາມາດໃນການຈັດຊື້-ຈັດຈ້າງ ຂອງບັນດາໂຄງການທີ່ໄດ້ຮັບທຶນຈາກ ADB ທີ່ຈັດຕັ້ງປະຕິບັດໃນ ສປປ ລາວ ໃຫ້ເຂັ້ມແຂງ ແລະ ມີຄຸນນະພາບ ໂດຍເປັນປະທານຂອງທ່ານ ນາງ ສີສົມບູນ ອຸນາວົງ ຫົວໜ້າກົມຮ່ວມມືສາກົນ ກະຊວງແຜນການ ແລະ ການລົງທຶນ ທ່ານ ນາງ ໂຊໂນມິ ທະນາກະ ຜູ້ຕາງໜ້າ ADB ປະຈຳລາວ  ມີບັນດາຫົວໜ້າໂຄງການຈາກໜ່ວຍງານຮັບຜິດຊອບໂຄງການ ຜູ້ອຳນວຍການໂຄງການຈາກໜ່ວຍງານຈັດຕັ້ງປະຕິບັດໂຄງການທີ່ໄດ້ຮັບທຶນຈາກ ADB ແລະ ພາກສ່ວນກ່ຽວຂ້ອງເຂົ້າຮ່ວມ

    ກອງປະຊຸມຄັ້ງນີ້ ໄດ້ຮຽນຮູ້ກ່ຽວກັບການຜັນຂະຫຍາຍ ແລະ ນໍາໃຊ້ກົດໜາຍການຈັດຊື້-ຈັດຈ້າງຂອງລັດຖະບານແຫ່ງ ສປປ ລາວ ພ້ອມທັງກົດລະບຽບການຈັດຊື້-ຈັດຈ້າງ ສໍາລັບຜູ້ກູ້ຢືມທຶນຂອງ ADB ສະບັບປີ 2017 ແລະ ຄູ່ມືແນະນໍາຕ່າງໆ ໂດຍສະເພາະກ່ຽວກັບກົນໄກການຮ້ອງທຸກ ການບໍລິຫານສັນຍາ ແລະ ການປະມູນທີ່ມີມູນຄ່າຕໍ່າຜິດປົກກະຕິ.

      ທ່ານ ນາງ ໂຊໂນມິ ທະນາກະ ກ່າວວ່າ: ການຈັດຊື້-ຈັດຈ້າງນີ້ ແມ່ນຄວາມຮຽກຮ້ອງຕ້ອງການ ເພື່ອເຮັດໃຫ້ການຈັດຕັ້ງປະຕິບັດບັນດາໂຄງການທີ່ໄດ້ຮັບທຶນສະໜັບສະໜູນຈາກ ADB ທີ່ພວມດຳເນີນໃນ ສປປ ລາວ ຢ່າງມີປະສິດທິຜົນ ເຊິ່ງມັນຈະຊ່ວຍເຮັດໃຫ້ລັດຖະບານຮັບປະກັນການຕອບສະໜອງຢ່າງຄ່ອງແຄ້ວ ແລະ ທັນເວລາ ຕໍ່ບັນຫາທີ່ກ່ຽວຂ້ອງກັບການຈັດຊື້-ຈັດຈ້າງ ໃນຫຼາຍຂັ້ນຕອນຂອງການຈັດຕັ້ງປະຕິບັດໂຄງການ ພ້ອມທັງບົດບາດຂອງ ADB ໃນການອໍານວຍຄວາມສະດວກໃນວຽກງານດັ່ງກ່າວ  ເຊິ່ງມາຮອດວັນທີ 31 ເມສາ 2021 ມູນຄ່າໂຄງການທັງໜົດທີ່ໄດ້ຮັບທຶນຈາກ ADB ສໍາລັບ ສປປ ລາວ ມີ 840 ລ້ານໂດລາສະຫະລັດ ສໍາລັບ 24 ໂຄງການທີ່ພວມດໍາເນີນງານໃນປັດຈຸບັນ ເພື່ອສະໜັບສະໜູນແກ່ການພັດທະນາຂອງ ສປປ ລາວ ໃນຂະແໜງການຕ່າງໆເຊັ່ນ: ການຮັບປະກັນສຸຂະພາບໃນການຮັບມືກັບການແຜ່ລະບາດພະຍາດໂຄວິດ-19 ການສຶກສາຊັ້ນສູງ ແລະ ການສຶກສາເຕັກນິກ ແລະ ການເຝີກອົບຮົມວິຊາຊີບ ປັບປຸງພື້ນຖານໂຄງລ່າງກະສິກໍາ ຄຸ້ມຄອງຊັບພະຍາກອນທໍາມະຊາດ ແລະ ສິ່ງແວດລ້ອມ ພ້ອມທັງການສະໜອງນໍ້າປະປາ ການບໍລິການໃນຕົວເມືອງ ທ່ອງທ່ຽວ ແລະ ການອຳນວຍຄວາມສະດວກທາງດ້ານການຄ້າ.

     ການຈັດກອງປະຊຸມຄັ້ງນີ້ ແມ່ນສ່ວນໜຶ່ງຂອງຊຸດເຝີກອົບຮົມຂອງ ADB ທີ່ກ່ຽວຂ້ອງກັບການຈັດຕັ້ງປະຕິບັດໂຄງການທີ່ມີປະສິດທິຜົນສຳລັບ ສປປ ລາວ ໃນປີ 2021 ເຊັ່ນ: ການເຝີກອົບຮົມກ່ຽວກັບຂັ້ນຕອນການປະມູນ ການເບີກ-ຈ່າຍເງິນກູ້ ການຮັກສາສິ່ງແວດລ້ອມ ແລະ ການປົກປ້ອງສັງຄົມ ແລະ ບົດບາດຍິງຊາຍ.

      ການປັບປຸງຄຸນນະພາບຂອງການຈັດຊື້-ຈັດຈ້າງ ບໍ່ພຽງແຕ່ຊ່ວຍຍົກສູງຄຸນນະພາບ ແລະ ປະສິດທິຜົນໃນການດຳເນີນງານໂຄງການຈົນສຳເລັດ ແຕ່ຍັງຊ່ວຍສົ່ງເສີມຄວາມໂປ່ງໃສ ແລະ ຄວາມຄຸ້ມຄ່າແກ່ເງິນລົງທຶນທີ່ລັດຖະບານໄດ້ລົງທຶນໃນບັນດາໂຄງການຕ່າງໆ ໂດຍຜ່ານການສະໜັບສະໜູນຂອງ ADB ໃນ ສປປ ລາວ ເພື່ອແນໃສ່ປະກອບສ່ວນເຂົ້າໃນຜົນສຳເລັດຂອງການພັດທະນາ ທີ່ໄດ້ລະບຸໄວ້ໃນແຜນພັດທະນາເສດຖະກິດ-ສັງຄົມຄັ້ງທີ 9 ຂອງລັດຖະບານ ກໍຄືເປົ້າໝາຍການພັດທະນາແບບຍືນຍົງໃຫ້ມີຜົນສຳເລັດເທື່ອລະກ້າວ.

# ຂ່າວ – ພາບ: ລັດເວລາ

The post ສ້າງຄວາມເຂັ້ມແຂງດ້ານການຈັດຊື້-ຈັດຈ້າງໃນໂຄງການທີ່ໄດ້ຮັບທຶນຈາກ ADB appeared first on Vientiane Mai.

    ວັນ​ທີ 23 ມິຖຸນາ 2021 ທີ່​ໂຮງ​ແຮມ​ຄລາ​ວ ພຣາຊາ ນະຄອນຫຼວງ​ວຽງ​ຈັນ ຫ້ອງການ​ຄຸ້ມ​ຄອງ ​ແລະ ບໍລິການ​ຕົວ​ເມືອງ​ນະຄອນຫຼວງວຽງ​ຈັນ (ຄບຕ) ຮ່ວມ​ກັບໂຄງການສະຖາບັນເຕີບໂຕສີຂຽວສາກົນ (GGGI)   ​ໄດ້​ຈັດກອງປະຊຸມນຳສະເໜີໂຄງການບໍລິການເກັບມ້ຽນຂີ້ເຫຍື້ອແບບບໍ່ລວມສູນ ພາຍໃຕ້ໂຄງການສ້າງຄວາມອາດສາມາດຄຸ້ມຄອງນໍ້າເປື້ອນ ແລະ ຂີ້ເຫຍື້ອສຳລັບປັບປຸງສິ່ງແວດລ້ອມຕົວເມືອງໃນ ສປປ ລາວ ພາຍໃຕ້ທຶນຊ່ວຍເຫຼືອລ້າຂອງລັດຖະບານ ສ ເກົາຫຼີ ແລະ ​ໂຄງການສະຖາບັນເຕີບໂຕສີຂຽວສາກົນ ​ເປັນ​ປະທານ​ຮ່ວມ​ຂອງ​ທ່ານ ບຸນ​ຈັນ ​ແກ້ວ​ສີ​ທຳ​ມະ ຫົວ​ໜ້າຫ້ອງການ​ຄຸ້ມ​ຄອງ ​ແລະ ບໍລິການ​ຕົວ​ເມືອງ​ນະຄອນຫຼວງວຽງ​ຈັນ ​ແລະ ທ່ານ ນາງ ​ໂຊ​ມີ​ຄິມ ຜູ້​ຊ່ຽວຊານ​ໂຄງການ​ສະຖາບັນເຕີບໂຕສີຂຽວສາກົນ ມີ​ບັນດາ​ຮອງ​ຫົວໜ້າ​ຫ້ອງການ ຄຕບ ​ແລະ ພະນັກງານ​ທີ່​ກ່ຽວຂ້ອງຫ້ອງການ ຄບຕ ນະຄອນຫຼວງ​ວຽງ​ຈັນ ຫ້ອງການ ຄບຕ ​ເມືອງສີ​ໂຄດ​ຕະບອງ ​ແລະ ຮອງ​ນາຍບ້ານ​ຜູ້​ຮັບຜິດຊອບ​ເກັບ​ຂີ້​ເຫຍື້ອ​ຂັ້ນ​ບ້ານ ​ບ້ານ​ໜອງ​ບົວທອງ​ເໜືອ ປາກ​ທ້າງ ​ແລະ ບ້ານດົງ​ນາ​ໂຊກ ​ເຂົ້າ​ຮ່ວມ.

   ກອງ​ປະຊຸມ​ຄັ້ງ​ນີ້ ​ຜູ້​ເຂົ້າ​ຮ່ວມ​ໄດ້​ຮັບ​ຟັງ ຮູ້ຈັກ​ກັບ​ໂຄງການ ປຶກສາ​ຫາລື ​ແລະ ສົນທະນາ​ກ່ຽວ​ກັບ​ບັນຫາ​ການ​ເກັບ​ມ້ຽນ​ຂີ້​ເຫຍື້ອ​ທີ່​ມີ​ຄຸນ​ນະພາ​ບ ​ແລະ ​ເປັນ​ມິດ​ກັບ​ສິ່ງ​ແວດ​ລ້ອມ ​ເພື່ອ​ສ້າງ​ໃຫ້​ສັງຄົມ​ ກໍ​ຄື​ນະຄອນຫຼວງ​ວຽງ​ຈັນ​ມີ​ຄວາມ​ສະອາດ​ງາມ​ຕາ​ ເປັນ​ຕົ້ນການນໍາສະເໜີການອອກແບບໂຄງການບໍລິການເກັບຂີ້ເຫຍື້ອແບບບໍ່ລວມສູນ  ການນໍາສະເໜີການອອກແບບທັງໝົດ ລວມເຖິງສູນຟື້ນຟູຂີ້ເຫຍື້ອ ການບໍລິການເກັບມ້ຽນຂີ້ເຫຍື້ອປົກຄຸມໃຫ້ໄດ້ 100% ກົນໄກການຄັດແຍກຂີ້ເຫຍື້ອ  ໂຄງຮ່າງການເກັບຄ່າທໍານຽມການເກັບມ້ຽນຂີ້ເຫຍື້ອ ການປຽບທຽບ 3 ທາງເລືອກສໍາລັບການບໍລິການເກັບຂີ້ເຫຍື້ອແບບບໍ່ລວມສູນ ການປຽບທຽບທາງເລືອກທີ 1 ທີ 2 ແລະ ທີ 3 ການປຽບທຽບການວິເຄາະດ້ານການເງິນ ການນໍາສະເໜີຮູບແບບຂອງລົດເກັບມ້ຽນຂີ້ເຫຍື້ອ ແລະ ການອອກແບບຖັງຂີ້ເຫຍື້ອສໍາລັບຄົວເຮືອນ ແບບຢ່າງຂອງການອອກແບບ ການໂຫວດເອົາແບບທີ່ດີທີ່ສຸດ ການນໍາສະເໜີວິທີການດໍາເນີນການຜະລິດ ແລະ ການອອກແບບສູນຟື້ນຟູຂີ້ເຫຍື້ອ ການນໍາສະເໜີກ່ຽວກັບງົບປະມານການເງິນໃນການດໍາເນີນການຜະລິດໃນສູນຟື້ນຟູຂີ້ເຫຍື້ອ ຮູບແບບການດໍາເນີນການຜະລິດ ແລະ ທາງເລືອກດ້ານການຈັດຊື້-ຈັດຈ້າງບໍລິສັດ ພາກເອກະຊົນທີ່ສາມາດເປັນຜູ້ດໍາເນີນການຜະລິດໃນສູນຟື້ນຟູຂີ້ເຫຍື້ອ ການນໍາສະເໜີແຜນໄລຍະເວລາການຈັດຕັ້ງກິດຈະກໍາຂອງໂຄງການ ແຜນການດໍາເນີນການເຊັນສັນຍາການບໍລິການເກັບມ້ຽນຂີ້ເຫຍື້ອ ​ແລະ ອື່ນໆ ​ເຊິ່ງກອງ​ປະຊຸມ​ຄັ້ງ​ນີ້ ​ຜູ້​ເຂົ້າ​ຮ່ວມ​ ໂດຍ​ສະ​ເພາະ ຄບຕ ​ແລະ ທາງ​ຄະນະ​ບ້ານ ​ໄດ້​ພ້ອມ​ກັນ​ປະກອບ​ຄຳ​ຄິດ​ຄຳ​ເຫັນ​ໃສ່​ໂຄງການ​ດັ່ງກ່າວ​ເພື່ອ​ເລືອກ​ທາງ​ເລືອກ​ທີ່​ດີ​ທີ່​ສຸດ.

# ຂ່າວ – ພາບ: ສົມສະຫວັນ

The post ນຳ​ສະ​ເໜີ​ໂຄງການບໍລິການ​ເ​ກັບ​ມ້ຽນ​ຂີ້​ເຫຍື້ອ​ແບບ​ບໍ່​ລວມສູນ appeared first on Vientiane Mai.

    ອີງ​ຕາມ​ການ​ລາຍ​ງານ​ຂອງ​ອົງການເພື່ອມະນຸດສະທຳ ແລະ ການມີສ່ວນຮ່ວມ (HI) ​ໃຫ້ຮູ້​ວັນ​ທີ 24 ມິຖຸນາ 2021 ​ວ່າ: ອົງການ HI ​ເປັນ​ອົງການ​ໜຶ່ງ​ທີ່​ໄດ້​ເອົາ​ໃຈ​ໃສ່​ປະຕິບັດ​ໜ້າ​ທີ່ຢູ່​ລາວ ​ໂດຍ​ສະ​ພາະ ​ໄລຍະ​ນີ້​ ສຸມ​ໃສ່​ຕ້ານ​ການລະບາດ​ຂອງ​ພະຍາດ​ໂຄ​ວິດ-19 ຢູ່​ລາວ ​ເຊິ່ງມັນສະ​ແດງ​ໃຫ້​ເຫັນ ​ໄດ້​ຈັດ​ໃຫ້​ມີ​ຫຼາຍ​ກີດ​ຈະ​ກຳ ​ເປັນ​ຕົ້ນ ການໂຄສະນາຊຸມຊົນກ່ຽວກັບພະຍາດໂຄວິດ-19: ທີມງານເກັບກູ້ລະເບີດຂອງອົງການ HI ແຂວງຫົວພັນ ໂດຍການສະໜັບສະໜູນຈາກພະນັກງານສາທາລະນະສຸກຂັ້ນເມືອງ ໄດ້ຈັດການໂຄສະນາເຜີຍແຜ່ຄວາມຮູ້ກ່ຽວກັບການປ້ອງກັນພະຍາດ​ໂຄ​ວິດ (ສົມທົບກັບການໂຄສະນາສຶກສາຄວາມສ່ຽງຈາກລະເບີດທີjຍັງບໍ່ທັນແຕກ) ມີຜູ້ເຂົ້າຮ່ວມກິດຈະກຳດັ່ງກ່າວ 1.177 ຄົນ ແລະ ເປັນຄົນພິການ 110 ຄົນ ໃນ 21 ບ້ານເປົ້າໝາຍຂອງເມືອງຫົວເມືອງ ແຂວງຫົວພັນ ປ້າຍໂຄສະນາ ແລະ ແຜ່ນພັບກ່ຽວກັບການປ້ອງກັນພະຍາດ​ໂຄ​ວິດ ໄດ້ແຈກຢາຍຢູ່ສະຖານທີ່ຕ່າງໆຂອງເມືອງ ນອກນັ້ນ ອົງການ HI ຍັງອຳນວຍຄວາມສະດວກໃນການເຂົ້າເຖິງວັກຊີນສຳລັບກຸ່ມຄົນທີ່ດ້ອຍໂອກາດ ລວມທັງຄົນພິການຕື່ມ​ອີກ.

    ການຂົນສົ່ງຜູ້ຕິດເຊື້ອພະຍາດ​ໂຄ​ວິດ: ອົງການ HI ໄດ້ເຊັນຂໍ້ຕົກລົງຮ່ວມມືກັບໜ່ວຍກູ້ໄພວຽງຈັນ 1623 ໃນເດືອນພຶດສະພາ 2021 ຜ່ານການຮ່ວມມືດັ່ງກ່າວ ລົດສຸກເສີນຂອງໜ່ວຍກູ້ໄພວຽງຈັນ 1623 ຈໍານວນ 7 ຄັນ ໄດ້ຮັບການປັບປຸງ ແລະ ສ້ອມແປງເພື່ອຕອບສະໜອງການຂົນສົ່ງຜູ້ຕິດເຊື້ອພະຍາດ​ໂຄ​ວິດ ຜູ້ຕິດເຊື້ອທັງໝົດ 460 ຄົນໄດ້ຮັບການນໍາສົ່ງໄປປິ່ນປົວຢູ່ໂຮງໝໍໃນນະຄອນຫຼວງວຽງຈັນ ນອກນີ້ ລົດຂອງອົງການ​ HI 2 ຄັນ ໄດ້ຮັບການດັດແປງເປັນລົດສຸກເສີນ ເຊິ່ງຈະຖືກນຳໃຊ້ຢູ່ແຂວງຫົວພັນ ເພື່ອຂົນສົ່ງຜູ້ຕິດເຊື້ອພະຍາດ​ໂຄ​ວິດ ແລະ ຮັບໃຊ້ເພື່ອຕອບສະໜອງຕາມການຮຽກຮ້ອງຂອງອຳນາດການປົກຄອງທ້ອງຖິ່ນ.

     ການແຈກຢາຍອຸປະກອນປ້ອງກັນໂຄວິດ: ອົງການ HI ໄດ້ສະໜອງອຸປະກອນປ້ອງກັນໂຄວິດໃຫ້ສູນປ້ອງກັນ ແລະ ຄອບຄຸມພະຍາດ​ໂຄ​ວິດເມືອງໄກສອນ ພົມວິຫານ ແຂວງສະຫວັນນະເຂດ ແລະ ເມືອງຊຳເໜືອ ແຂວງຫົວພັນ ມີຈຳນວນຜູ້ໄດ້ຮັບຜົນປະໂຫຍດທັງໝົດ 50.903 ຄົນ ​ໃນ​ນັ້ນ​ ໄດ້​ຮັບ​ຜົນ​ປະ​ໂຫຍ​ດທາງກົງ 1.249 ຄົນ ແລະ ທາງອອ້ມ 49.654 ຄົນ ​ເຊິ່ງທຸກ​ກິດຈະກຳ ​ໄດ້​ຮັບ​ການສະໜັບສະໜູນທຶນຈາກສະຫະພາບເອີຣົບ ກະຊວງ​ການ​ຕ່າງປະ​ເທ​ດຂອງປະ​ເທດ​ນອ໊ກແວ ແລະ ກະຊວງ​ການ​ຕ່າງປະ​ເທ​ດຂອງປະ​ເທດ​ລຸກ​ຊຳ​ບວກ.

# ຂ່າວ – ພາບ: ສົມສະຫວັນ

The post ອົງການ​ HI ​ຊ່ວຍຕອບໂຕ້ພະຍາດໂຄວິດຢູ່​ລາວ appeared first on Vientiane Mai.